У Польшчы зарэгістравана асацыяцыя па стварэнні Беларускага даследчага ўніверсітэта

2 кастрычніка, Позірк. У Польшчы зарэгістравана “Асацыяцыя па стварэнні Беларускага даследчага ўніверсітэта імя Астафея Валовіча”, паведамляецца на старонцы ініцыятывы ў “Фэйсбуку”.

Суд у Варшаве 23 верасня “прыняў пастанову аб рэгістрацыі асацыяцыі “Astafiej Valovic Belarusian Research University”. Арганізацыя атрымала нумар у Нацыянальным судовым рэестры Польшчы і мае юрыдычны адрас у Варшаве.

“Рэгістрацыя асацыяцыі азначае завяршэнне падрыхтоўчага этапу і пераход да юрыдычна замацаванага існавання ініцыятывы па стварэнні Беларускага даследчага ўніверсітэта”, — гаворыцца ў рэлізе.

Падкрэсліваецца, што рэгістрацыя аб’яднання — гэта першы крок, каб універсітэт быў афіцыйна прызнаны ў адукацыйнай прасторы Польшчы. 

У студзені 2024 года Аб’яднаны пераходны кабінет паведаміў, што будзе працаваць над стварэннем беларускага ўніверсітэта з навукова-даследчым профілем за мяжой.

У траўні мінулага года член аргкамітэта Павел Баркоўскі паведаміў, што бюджэт установы спланаваны на ўзроўні амаль 6 млн еўра — за кошт спонсарскіх праграм, данатаў і фондаў, індывідуальных і інстытуцыянальных міжнародных даследчых грантаў, а таксама платных паслуг — за навучанне на асобных праграмах, выкананне навуковых і практычна-навуковых даследаванняў.

Астафей Валовіч (1520–1587) — дзяржаўны дзеяч Вялікага Княства Літоўскага.