16 кастрычніка, Позірк. Узровень аховы беларускага дэмакратычнага лідара як абранага прэзідэнта павінен застацца ў ранейшым, бо “беларускі рэжым ніяк не змяніўся”. Такое меркаванне выказаў на ютуб-канале “Обычное утро” 16 кастрычніка дэпутат, віцэ-старшыня Камітэта па еўрапейскіх справах Сейма Літвы Томас Тамілінас.
Дыскусія аб зніжэнні статусу аховы Святланы Ціханоўскай у Літве — гэта “магчымасць яшчэ раз расказаць літоўцам, якія плюсы прыносіць прысутнасць беларускай апазіцыі ў Вільні літоўскаму народу”, які “зусім не ўдзельнічае” ў беларускай “інфармацыйнай бурбалцы”, і наогул не ведае нічога, “акрамя таго, што калі статус плюс ахова“, сказаў парламентарый.
Паводле Тамілінаса, беларускія арганізацыі прыцягваюць у яго краіну “дзясяткі мільёнаў еўра з еўрапейскага бюджэту, з бюджэту іншых краін, з бюджэту ЗША раней прыцягвалі”, але “гэтага ніхто асабліва не ведае”. Пры гэтым, як падкрэсліў дэпутат Сейма, усё фінансаванне “абсалютна празрыста” і выгадна краіне.
“Вось гэта трэба проста данесці да людзей”, — адзначыў ён.
Дзякуючы працы Офіса Ціханоўскай у Вільнюса “ёсць нейкія дадатковыя перавагі ў дыпламатычных адносінах”, “ёсць магчымасць аказваць уплыў на еўрапейскую палітыку з дапамогай таго, што тут офіс, з якім вядуць пастаянныя перагаворы кіраўніка дзяржаў”, сказаў парламентарый.
Адначасова сярод грамадзян краіны “абсалютна проста распаўсюджваюцца крамлёўскія наратывы” аб тым, што тут на тэрыторыі Літвы ў асобе беларускіх дэмсіл знаходзяцца “нейкія дармаеды”, адзначыў ён.
Тамілінас паведаміў, што 15 кастрычніка “група сяброў Беларусі” ў Сейме, у якую ён таксама ўваходзіць, выступіла з заявай, дзе заклікае захаваць статус Офіса Ціханоўскай у Літве. Яго тэкст размясціў у “Фэйсбуку“ старшыня групы Русланас Баранавас.
Дзейнасць Офіса Святланы Ціханоўскай у Вільнюсе павялічвае ўплыў і аўтарытэт Літвы на міжнароднай арэне, лічаць аўтары.
Беларускія арганізацыі ў выгнанні з 2020 года, як гаворыцца ў заяве, прыцягнулі каля 310 млн еўра з еўрапейскіх і амерыканскіх фондаў — у прыватнасці, гаворка аб праваабаронцах, незалежных медыя і “іншых дэмакратычных арганізацыях”: “Часткова гэтыя сродкі адмініструюцца праз зарэгістраваныя ў Літве арганізацыі, якія плацяць падаткі ў літоўскі бюджэт.
7 кастрычніка стала вядома, што Літва зніжае ўзровень фізічнай аховы Ціханоўскай, якая разам з сям’ёй пражывае ў літоўскай сталіцы. Афіцыйная прычына — рэвізія ўзроўню пагроз. Гэтае рашэнне рэзка раскрытыкавалі Тамілінас і былы міністр замежных спраў Габрыэлюс Ландсбергіс. Экс-прэм’ер Літвы Інгрыда Шыманітэ назвала рашэнне не тэхнічным, а палітычным.
Пра тое, што сітуацыя з аховай Ціханоўскай драматызуецца, заявіў прэзідэнт Гітанас Наўседа 14 кастрычніка.
