24 кастрычніка, Позірк. У дачыненні да польскага перавозчыка распачаты адміністрацыйны працэс за спробу “ашчадзіць на мытных плацяжах звыш 110 тыс. рублёў”, вынікае з паведамлення прэс-службы Дзяржаўнага мытнага камітэта.
Паводле інфармацыі ведамства, падчас праверкі грузавога аўтамабіля DAF, які накіроўваўся ў Беларусь праз пункт пропуску Казловічы (з польскага боку — Кукурыкі), мытнікі выявілі неадпаведнасць звестак пра партыю тавару.
У грузавіку знаходзіліся “посуд, садовае абсталяванне для апрацоўкі дрэў, запасныя часткі да яго ды іншыя тавары” агульным коштам — “згодна з заяўленымі звесткамі” — больш за 90 тыс. рублёў.
“Ад дакументаў, якія паказваюць рэальны кошт транспартаванага тавару, кіроўца пазбавіцца канчаткова не паспеў, — гаворыцца ў паведамленні. — У другім разарваным камплекце, які выявіўся арыгінальным, кошт адрозніваўся ад заяўленага ў пяць разоў — звыш 480 тыс. рублёў”.
Частка 3 артыкула 15.5 КаАП (недэклараванне або прадстаўленне недакладных звестак пра тавары), паводле якой распачаты працэс, прадугледжвае штраф — да 30% кошту прадмета адміністрацыйнага правапарушэння.
