45-гадовы электраманцёр загінуў праз наезд пагрузчыка на прадпрыемстве ў Жодзіна

31 кастрычніка, Позірк. Жодзінскім гарадскім аддзелам Следчага камітэта (Мінская вобласць) устанаўліваюцца абставіны смерці супрацоўніка “аднаго з горадаўтваральных прадпрыемстваў”, паведамляе ведамства.

45-гадовы электраманцёр загінуў 27 кастрычніка. Паводле папярэдніх даных, каля 14 гадзін на яго здзейсніў наезд 46-гадовы кіроўца вілачнага пагрузчыка “EP CPCD60” у тэхнічным праездзе паміж цэхамі.

Паведамляецца, што на месца здарэння неадкладна прыбыла следча-аператыўная група. “Следчым з прыцягненнем спецыялістаў упраўлення Дзяржаўнага камітэта судовых экспертыз па Мінскай вобласці і прадстаўнікоў Дэпартамента дзяржаўнай інспекцыі працы праведзены дэталёвы агляд месца здарэння. Канфіскаваная неабходная дакументацыя па тэхніцы бяспекі, дапытаныя сведкі таго, што адбылося. Прызначаны шэраг экспертных даследаванняў для ўстанаўлення ўсіх абставінаў таго, што здарылася”, — адзначылі ў СК.

Узбуджана крымінальная справа паводле ч. 1 арт. 144 КК (прычыненне смерці па неасцярожнасці).