Былы баец ПКК Васіль Верамейчык прыгавораны да 13 гадоў пазбаўлення волі — СМІ
28 лістапада, Позірк. Былы баец палка імя Кастуся Каліноўскага, чалец фракцыі “Блок Пракоп’ева-Ягорава” (цяпер “Беларусы”) у Каардынацыйнай радзе (КР) Васіль Верамейчык прыгавораны да 13 гадоў пазбаўлення волі.
Пра гэта паведаміў тэлеканал “Белсат” са спасылкай на жонку экс-добраахвотніка Яўгенію.
Паводле якіх артыкулаў Крымінальнага кодэкса абвінавачвалі Верамейчыка, не паведамляецца.
У лістападзе 2024 года стала вядома, што Верамейчык быў дастаўлены ў Беларусь пад канвоем. Паводле інфармацыі яго паплечнікаў па КР, мужчына быў затрыманы 13 лістапада ў Хашыміне (В’етнам).
Верамейчык у 2020 годзе ўдзельнічаў у пратэстах у Беларусі, затым пераехаў ва Украіну, дзе пасля пачатку поўнамаштабнага ўварвання расійскіх войскаў і стварэння палка Каліноўскага служыў намеснікам камандзіра батальёна “Волат”. Быў паранены, мае ўзнагароды.
З інфармацыі на сайце праваабарончага цэнтра “Вясна” вынікае, што за ўдзел у пратэстах у дачыненні да Верамейчка была ўзбуджаная крымінальная справа паводле арт. 366 КК (гвалт альбо пагроза ў дачыненні да службовай асобы, якая выконвае службовыя абавязкі, ці іншай асобы, якая выконвае грамадскі абавязак).
У 2024 годзе, пасля заканчэння службы, Верамейчык быў абраны ў КР і стаў сузаснавальнікам Асацыяцыі беларускіх ветэранаў.
Паводле звестак “Позірку”, пасля адмовы Літвы ў прадстаўленні права на жыхарства Верамейчык у кастрычніку 2024 года беспаспяхова спрабаваў трапіць у Грузію з Турцыі.
Літва прызнала яго пагрозай нацыянальнай бяспецы праз тое, што ў 2010–2016 гадах ён служыў у беларускім войску. Яму выдалі забарону на ўезд у ЕС на 30 месяцаў.
27 лістапада 2024 года праваабаронцы прызналі былога добраахвотніка палітвязнем.
