Лукашэнка абразіў поўных суграмадзян, якія траплялі ў рэанімацыю падчас кавіду
На Усебеларускім народным сходзе Аляксандр Лукашэнка паказаў тэкст свайго выступлення, раздрукаваны вельмі буйным шрыфтам
18 снежня, Позірк. У лішняй вазе абвінаваціў Аляксандр Лукашэнка суграмадзян, якія траплялі ў рэанімацыю падчас пандэміі каранавіруса COVID-19.
“Ніколі ў нас не было такіх магчымасцяў займацца любымі відамі спорту. Хто і як іх выкарыстоўвае — пытанне, мне вось тут у адміністрацыі напісалі, “асабістае“. Ды нічога не асабістае. Мы не шануем сваё здароўе, а потым трацім велізарныя грошы і плацім адпаведным катэгорыям лекараў для таго, каб выцягнуць вас, засланіць вас ад гэтай хваробы. Памятаеце гэтую пандэмію? Калі вы не памятаеце, я добра гэта запомніў, я часта прыводжу гэты прыклад. Калі я прыходзіў у рэанімацыйныя аддзяленні разам з міністрам [аховы здароўя], заходзіў туды — там вось такія горы ляжалі, жывот да столі, ніводнага худога чалавека не было”, — заявіў Лукашэнка, выступаючы 18 снежня са штогадовым пасланнем народу і парламенту на VII Усебеларускім народным сходзе.
“Лішняя вага — гэта катастрофа. Гэта я вам кажу, ведаю, што кажу”, — дадаў Лукашэнка, які сам мае значную лішнюю вагу.
Падчас пандэміі ён ужо абвінавачваў у наяўнасці лішняй вагі грамадзян, якія захворвалі і паміралі ад кавіду.
71-гадовы Лукашэнка хавае ад публікі праблемы са зрокам, практычна не апранаючы акуляры. Падчас выступу на УНС ён паказаў тэкст свайго выступу, раздрукаваны вельмі буйным шрыфтам (на фота).
