МУС паведаміла аб выкраданні 18-гадовай дзяўчыны ў Слуцкім раёне, падазраванага затрымлівалі са стральбой

31 снежня, Позірк. Аб выкраданні чалавека ў Слуцкім раёне паведаміла 31 снежня УУС Мінскага аблвыканкама.

Адзначаецца, што ў міліцыю звярнуўся мясцовы жыхар і паведаміў, што “яго 18-гадовую знаёмую невядомы мужчына сілком пасадзіў у аўтамабіль і павёз”. Пасля паведамлення “на месца здарэння неадкладна выбылі супрацоўнікі мясцовага РАУС”.

“Нарад міліцыі паблізу аграгарадка Лучнікі выявіў падобны па апісанні “Опель” і падаў сігнал аб спыненні. Кіроўца яго праігнараваў і працягнуў рух. Пачалася пагоня”, — гаворыцца ў паведамленні.

Далей, паводле версіі міліцыі, “калі падазраваны запаволіўся, выкрадзенай удалося вырвацца”. “Яе пасадзілі ў службовае аўто і працягнулі пераслед”, — адзначае УУС.

Паведамляецца, што “кіроўца не падпарадкоўваўся неаднаразовым законным патрабаванням міліцыянераў аб спыненні, ствараючы пры руху рэальную пагрозу жыццю і здароўю грамадзян”, таму “было прынята рашэнне выкарыстоўваць зброю”.

“За рулём апынуўся 32-гадовы раней неаднаразова судзімы мясцовы жыхар, які паводзіў сябе неадэкватна (папярэдне, пад уздзеяннем псіхаактыўных рэчываў). Ён затрыманы і змешчаны ў ізалятар часовага ўтрымання, біялагічныя ўзоры адпраўленыя на экспертызу”, — адзначаецца ў рэлізе.

У дачыненні да затрыманага распачатая крымінальная справа за “выкраданне чалавека”.