Інфармацыйны пункт Савета Еўропы для беларусаў адкрыецца ў Вільнюсе 12 траўня з удзелам генеральнага сакратара СЕ і Ціханоўскай

7 траўня, Позірк. Генеральны сакратар Савета Еўропы (СЕ) Ален Берсэ возьме ўдзел у адкрыцці інфармацыйнага пункта яго арганізацыі для беларускіх грамадзян у Вільнюсе 12 траўня, вынікае з інфармацыі на сайце СЕ.

Паведамляецца, што цырымонія адкрыцця пункта, які атрымаў акрэдытацыю ў МЗС Літвы, адбудзецца ў 19.00 у Літоўскай нацыянальнай бібліятэцы імя Марцінаса Мажвідаса.

На сустрэчы плануюць выступіць міністр замежных спраў краіны Кястуціс Будрыс і беларускі дэмакратычны лідар Святлана Ціханоўская.

Адзначаецца, што перад адкрыццём генеральны сакратар СЕ сустрэнецца з прадстаўнікамі беларускай грамадзянскай супольнасці.

“Інфармацыйны пункт будзе павышаць дасведчанасць беларускіх грамадзян, уключаючы прадстаўнікоў грамадзянскай супольнасці і СМІ, аб фундаментальных каштоўнасцях і прававых інструментах Савета Еўропы, а таксама падтрымліваць дзейнасць, якая ажыццяўляецца ў рамках Кантактнай групы Савета Еўропы па супрацоўніцтве з прадстаўнікамі беларускіх дэмакратычных сіл і грамадзянскай супольнасці“, — сказана ў рэлізе.

Згаданая Кантактная група была створаная 7 верасня 2022 года, яна працуе з шырокім колам беларускіх грамадскіх ініцыятыў. Пасяджэнні праводзяцца два разы на год.

26 лютага прэс-служба СЕ перадала “Позірку“ пералік мерапрыемстваў на 2026-2027 гады, які будзе рэалізаваны ў рамках згаданай групы. Сярод іншага было “прадугледжана адкрыццё інфармацыйнага пункта для беларускага насельніцтва ў Вільнюсе”.

Ціханоўская апошні раз сустракалася з Берсэ 4 траўня ў Ерэване на палях саміту Еўрапейскай палітычнай супольнасці.

Інфармацыйны пункт Савета Еўропы ў Мінску быў адкрыты ў 2009 годзе на базе Інстытута журналістыкі Белдзяржуніверсітэта (вул. Кальварыйская, 9). Спыніў дзейнасць да 2015 года.

Беларусь не з’яўляецца членам СЕ. У 1993 годзе яна падала заяўку на ўступленне, аднак пасля канстытуцыйнага рэферэндуму 1996 года пазбавілася статусу спецыяльнага запрошанага. У краіне па-ранейшаму вышэйшай мерай пакарання з’яўляецца смяротнае пакаранне. Яе адмена — адна з умоў членства ў СЕ.