Лукашэнка ў віншаванні папу рымскаму Льву XIV не паўтарыў леташняга запрашэння наведаць Беларусь

8 траўня, Позірк. З першай гадавінай урачыстага пачатку пантыфікату павіншаваў папу рымскага Льва XIV Аляксандр Лукашэнка, паведамляе яго прэс-служба.

Віншавальнік адзначыў, што “паслядоўная і прынцыповая пазіцыя Святога Пасаду, накіраваная на дээскалацыю крызісных сітуацый, прымірэнне бакоў і пацвярджэнне безумоўнай каштоўнасці чалавечага жыцця, выклікае шчырую павагу і прызнанне”.

Лукашэнка выказаў упэўненасць, што служэнне папы “будзе і надалей заставацца важным арыенцірам для міжнароднай супольнасці ў пошуку ўзаемаразумення, шляху да канструктыўнага дыялогу і справядлівых рашэнняў дзеля глабальнай стабільнасці”.

“Ва ўмовах шматлікіх узброеных канфліктаў і глыбокіх супярэчнасцяў у свеце ваш голас нязменна гучыць як заклік да міру і гуманізму”, — падкрэсліваецца ў віншаванні.

8 траўня 2025 года Лукашэнка павіншаваў Льва XIV з абраннем папам рымскім і запрасіў яго ў Беларусь.

69-гадовы амерыканскі кардынал Роберт Фрэнсіс Прэвост быў абраны кіраўніком Рымска-каталіцкай царквы пасля смерці папы Францішка 21 красавіка 2025 года.

Фактычна кіраўнік Святога Пасаду не можа прыехаць з-за сакрэтнага правіла: папа не наведвае краіны, дзе дамінуе іншая канфесія або рэлігія, без згоды адпаведнага рэлігійнага лідара. У выпадку Беларусі, якая лічыцца краінай з праваслаўнай большасцю, гаворка пра патрыярха Маскоўскага і ўсяе Русі Кірыла (Гундзяева).

Як паведамляў партал Рымска-каталіцкага касцёла ў Беларусі 22 траўня, старшыня Канферэнцыі каталіцкіх біскупаў Беларусі (ККББ), мітрапаліт Мінска-Магілёўскі арцыбіскуп Іосіф Станеўскі перадаў папу Льву XIV афіцыйнае запрашэнне наведаць беларускую зямлю.

Беларускія дэмакратычныя сілы пасля абрання Льва XIV папам рымскім выказалі надзею, што ён стане голасам падтрымкі для пераследуемых.

“Мы верым, што ваша слова можа стаць голасам падтрымкі для нашых палітвязняў, для іх сем’яў. Голасам для ўсіх, хто не страціў веры нават у самых цяжкіх умовах нашай рэчаіснасці”, — падкрэсліла дэмлідар Святлана Ціханоўская.

Надзею, што Леў XIV стане голасам сумлення і падтрымкі для тых, хто верыць у праўду і свабоду, выказаў Павел Латушка, віншуючы новага папу з абраннем на апостальскі пасад.

Дапаможны біскуп Пінскай дыяцэзіі Андрэй Зноска запрасіў папу рымскага Льва XIV наведаць Беларусь 1 кастрычніка 2025 года падчас аўдыенцыі на плошчы св. Пятра ў Ватыкане.

Пасля прэзідэнцкіх выбараў 2020 года адносіны дзяржавы і царквы ў Беларусі ўскладніліся ў сувязі з тым, што многія каталіцкія іерархі і вернікі адкрыта выступілі супраць хвалі гвалту і рэпрэсій, якія рушылі за масавымі пратэстамі супраць фальсіфікацыі вынікаў галасавання на карысць Лукашэнкі.