Грамадзяне Беларусі змогуць наведваць Шры-Ланку па бясплатных электронных візах

13 траўня, Позірк. Прэс-служба Міністэрства замежных спраў паведаміла 13 траўня аб сустрэчы ў Мінску кіраўніка ведамства Максіма Рыжанкова з міністрам замежных спраў, працаўладкавання за мяжой і турызму Шры-Ланкі Віджытай Хератам.

“Суразмоўцы правялі грунтоўны абмен думкамі па пытаннях двухбаковага супрацоўніцтва, а таксама ўзаемадзеяння на глабальнай арэне”, — адзначае МЗС.

На сустрэчы, як заяўляецца, падкрэслена “падабенства падыходаў Беларусі і Шры-Ланкі па найбольш актуальных пытаннях сучаснага парадку дня”, пацверджана “гатоўнасць і далей аказваць адзін аднаму падтрымку ў міжнародных арганізацыях”.

“Міністры пагадзіліся з неабходнасцю прыняць усе меры для рэалізацыі патэнцыялу эканамічнага супрацоўніцтва, арыентуючыся на прыклад эфектыўных сувязяў у адукацыйнай і турыстычнай галінах”, — паведамляе ведамства.

Беларускі бок “выказаў гатоўнасць актыўна садзейнічаць сацыяльна-эканамічнаму развіццю Шры-Ланкі як шляхам нарошчвання паставак угнаенняў і тэхнікі, так і ў рамках падрыхтоўкі ланкійскіх кадраў па запатрабаваных спецыяльнасцях”.

Дасягнутыя дамоўленасці аб “далейшай актывізацыі двухбаковых палітычных кантактаў, а таксама аб падрыхтоўцы да правядзення да канца 2026 года 3-га пасяджэння сумеснай беларуска-ланкійскай камісіі па гандлёвым і эканамічным супрацоўніцтве”.

Сцвярджаецца таксама, што Рыжанкоў і Херат дамовіліся аб распрацоўцы “дарожнай карты двухбаковага супрацоўніцтва на сярэднетэрміновую перспектыву, якая ахоплівае ўсе важнейшыя напрамкі ўзаемадзеяння Беларусі і Шры-Ланкі”.

Акрамя таго, Херат заявіў, што “з улікам дружалюбных міждзяржаўных адносін” грамадзяне Беларусі змогуць уязджаць на Шры-Ланку па бясплатных электронных візах.

Аб афіцыйным візіце Херата ў Беларусь з 12 па 15 траўня паведамлялася напярэдадні. Анансаваная яго сустрэча з Аляксандрам Лукашэнкам.

Таксама запланаваныя сустрэчы кіраўніка МЗС Шры-Ланкі з міністрамі адукацыі і аховы здароўя Беларусі. Падчас візіту “мяркуецца падпісанне з Рэспублікай Беларусь шэрагу мемарандумаў аб узаемаразуменні і пагадненняў у розных сферах“.

Чакаецца, што ў рамках гэтага візіту краіны падпішуць пагадненне аб паветраных зносінах, а таксама мемарандумы аб узаемаразуменні па супрацоўніцтве ў сферах вышэйшай адукацыі і аховы здароўя.

У Мінску кіраўнік ланкійскай дыпламатыі выступіць на круглым стале па пытаннях бізнесу і турызму, які арганізуе Нацыянальны цэнтр падтрымкі экспарту. Таксама запланаваная яго сустрэча з навучэнцамі ў Беларусі студэнтамі са Шры-Ланкі.

Летась у кастрычніку стала вядома, што ў парламенце Шры-Ланкі створаная група сяброўства з Беларуссю. Рашэнне прынятае на пасяджэнні заканадаўчага органа гэтай краіны, у якім узяў удзел амбасадар Беларусі ў Індыі і Шры-Ланцы па сумяшчальніцтве Міхаіл Касько.

Паводле інфармацыі МЗС, на пасаду адказнага сакратара гэтай групы абраны выпускнік Віцебскага дзяржаўнага медыцынскага ўніверсітэта Патманатан Сатыялінгам.

9 кастрычніка Касько перадаў спікеру ланкійскага парламента Джагат Вікрамаратнае запрашэнне ад старшыні Савета Рэспублікі Наталлі Качанавай наведаць Беларусь у складзе дэлегацыі. Беларускі дыпламат і ланкійскі парламентарый падкрэслілі “высокі ўзровень супрацы па шырокім спектры кірункаў”, абмеркавалі “перспектывы нарошчвання ўзаемадзеяння ў сферы прамысловасці, сельскай гаспадаркі і альтэрнатыўнай энергетыкі”.

10 кастрычніка Касько абмеркаваў з намеснікам міністра транспарту, аўтамабільных дарог, партоў і грамадзянскай авіяцыі Шры-Ланкі Капілай Перэрай “шэраг актуальных пытанняў супрацоўніцтва ў сферы грамадзянскай авіяцыі”.

“Кіраўнік беларускай дыпмісіі адзначыў, што адкрыццё з кастрычніка 2025 года прамых чартарных авіярэйсаў з Беларусі ў Шры-Ланку з’яўляецца знакавай падзеяй напярэдадні святкавання 25-годдзя ўстанаўлення дыпламатычных стасункаў паміж краінамі, — гаварылася ў паведамленні МЗС. — Бакі пагадзіліся, што неабходна рухацца далей у гэтым кірунку і выйсці ў найбліжэйшы час на падпісанне Пагаднення аб паветраных зносінах, якое дасць магчымасць запусціць рэгулярныя авіязносіны паміж Мінскам і Каломба”.

Мінск мяркуе, што “гэта створыць камфортныя ўмовы для падарожжаў грамадзян і стане дадатковым стымулам для развіцця супрацы ў адукацыйнай, турыстычнай і эканамічнай сферах”.

Дыпламатычныя стасункі паміж Беларуссю і Дэмакратычнай Сацыялістычнай Рэспублікай Шры-Ланка ўсталяваныя 20 лістапада 2000 года.

Паводле даных на сайце амбасады Беларусі ў Індыі, у 2021 годзе тавараабарот са Шры-Ланкай вырас да 39,6 млн долараў (+23,7%), беларускі экспарт павялічыўся да 31 млн (+27,2%), імпарт — да 8,5 млн долараў (+13%). Асноўная экспартная прадукцыя ў Шры-Ланку — калійныя ўгнаенні, імпартная — гарбата ​​і раслінныя валокны.

Актуальных даных пра ўзаемны гандаль на сайце амбасады не прадстаўлена.