МУС паведаміла аб прадухіленні вывазу ў РФ партыі металу — грузавік спынялі з удзелам АМАПу

17 траўня, Позірк. Аб прадухіленні вывазу з Беларусі партыі металу паведаміла 17 траўня Міністэрства ўнутраных спраў.

Адзначаецца, што супрацоўнікі ведамства па барацьбе з эканамічнымі злачынствамі і прадстаўнікі Дзяржаўтаінспекцыі “пры сілавой падтрымцы байцоў АМАПу” затрымалі ў Талачынскім раёне (Віцебская вобласць) грузавік “Рэно”. Аўтамабіль рухаўся па дарозе М1 “Брэст — Мінск — мяжа РФ”.

За рулём грузавіка знаходзіўся 55-гадовы жыхар Светлагорска (Гомельская вобласць).

“Пры аглядзе транспартнага сродку міліцыянеры выявілі каля 20 т лому чорных і каляровых металаў на агульную суму звыш 35 тыс. рублёў. Груз перавозіўся без суправаджальных дакументаў”, — гаворыцца ў паведамленні.

“Мужчына прызнаўся, што планаваў рэалізаваць метал у Расіі”, — паведамілі ў МУС.

Гл. таксама:

Прадухілены вываз у Расію чарговай партыі каляровых металаў

МУС спыніла спробу вывазу ў Расію буйной партыі каляровых металаў