Літва не плануе забараняць аўтобусныя зносіны з Беларуссю — міністр транспарту Тамінскас
Пункт пропуску Мядзінінкай на літоўска-беларускай мяжы
17 траўня, Позірк. Літва “не бачыць неабходнасці” забараняць пасажырскія аўтобусныя зносіны з Беларуссю, заявіў міністр транспарту балтыйскай краіны Юрас Тамінскас.
“Мы абмежавалі колькасць маршрутаў з Беларуссю да 29. Гэта абраны на сённяшні дзень аптымальны паказчык для забеспячэння бяспекі”, — цытуе міністра партал lnk.lt.
Паводле слоў Тамінскаса, “крайнія меры” ў дачыненні да рэгулярных аўтобусных рэйсаў магчымыя, калі “сітуацыя ў краіне стане некіравальнай”.
У публікацыі адзначаецца, што тэма аўтобусных перавозак абмяркоўваецца ў Літве ў кантэксце бяспекі грамадзян краіны, якія наведваюць Беларусь.
“Дзяржаўныя ўлады неаднаразова папярэджвалі, што падарожнікі могуць стаць лёгкай мішэнню для аўтарытарнага рэжыму [Аляксандра Лукашэнкі]”, — гаворыцца ў матэрыяле.
Звяртаецца ўвага, што адпаведны законапраект цяпер рыхтуецца ў Латвіі.
Пры гэтым, як паведамляецца, у Латвіі маршрутаў у Беларусь “значна менш” — “з Рыгі ў Мінск усяго пяць у дзень”.
“Латвія імкнецца абараніць сваіх грамадзян ад магчымай вярбоўкі”, — адзначае СМІ.
Папраўкі аб забароне рэгулярных аўтобусных зносін з Беларуссю падрыхтаваныя Міністэрствам транспарту Латвіі. Нерэгулярныя аўтобусныя рэйсы ў Беларусь прыпыненыя ў гэтай краіне з 1 лістапада 2025 года.
Гл. таксама:
Дзяржканал АНТ заявіў аб раскрыцці ў Беларусі “агентурнай сеткі літоўскіх спецслужбаў”
Пасля ўводу абмежаванняў на ўвоз паліва Літва не ўпусціла аўтобусы з Беларусі
Літва не ўпусціла 20 цягачоў з Беларусі за тры дні дзеяння ліміту на ўвоз паліва
Сейм Літвы падоўжыў да канца 2027 года санкцыі ў дачыненні да грамадзян Беларусі і РФ
