20 траўня, Позірк. Стаўка рэфінансавання 1 чэрвеня зніжаецца з 9,75 да 9,25% гадавых, паведамляе прэс-служба Нацбанка.
Стаўка па крэдыце овернайт памяншаецца з 11,25 да 10,75% гадавых.
Магчымае зніжэнне паказчыка на 0,25-0,5 працэнтнага пункта анансаваў начальнік галоўнага ўпраўлення манетарнай палітыкі і эканамічнага аналізу НБ Дзмітрый Мурын.
Сённяшняе рашэнне старшыня праўлення НБ Раман Галоўчанка аргументаваў тым, што “макраэканамічныя паказчыкі дэманструюць стабільны трэнд” (цытата паводле дзяржСМІ).
25 чэрвеня 2025 года Нацбанк павысіў стаўку рэфінансавання з 9,5 да 9,75% гадавых.
Да гэтага рэгулятар панізіў СР з 9,75 да 9,5% гадавых 28 чэрвеня 2023 года. На працягу 2023 года стаўка пастаянна паніжалася: 23 студзеня — з 12 да 11,5%, 1 сакавіка — да 11%, 3 красавіка — да 10,5%, 2 траўня — да 10%, 31 траўня — да 9,75%.
Раней стаўка ў апошні раз павышалася 1 сакавіка 2022 года — з 9,25 да 12%.
Абнаўленне:
Галоўчанка назваў верагодным яшчэ адно зніжэнне стаўкі рэфінансавання да канца 2026 года.
“Мы паглядзім, як эканоміка адрэагуе на сённяшняе рашэнне, як будзе развівацца сітуацыя на знешнім контуры, наколькі будуць устойлівыя макраэканамічныя працэсы ў нашай эканоміцы“, — заявіў ён па выніках пасяджэння праўлення НБ.
Паводле сцвярджэння чыноўніка, “заўсёды ёсць два варыянты“: “Калі будуць спрыяльна развівацца падзеі, то мы не выключаем, што вернемся яшчэ раз да гэтага пытання сёлета” (цытата паводле відэазапісу прэс-службы Нацбанка).
