Ціханоўская сустрэлася ў Лондане з прэм’ер-міністрам Вялікабрытаніі Стармерам (дапоўнена)

2 чэрвеня, Позірк. Прэс-служба дэмакратычнага лідара Святланы Ціханоўскай паведаміла 2 чэрвеня пра яе сустрэчу з прэм’ер-міністрам Вялікабрытаніі Кірам Стармерам.

Месцам сустрэчы стала афіцыйная рэзідэнцыя Стармера ў Лондане на вуліцы Даўнінг-стрыт.

З беларускага боку, мяркуючы па раней апублікаваным фота, у сустрэчы прыняў удзел дарадца Ціханоўскай па дыпламатычных пытаннях Дзяніс Кучынскі.

Адзначаецца, што палітыкі абмеркавалі падтрымку дэмакратычнай Беларусі, сітуацыю з палітвязнямі, неабходнасць дапамогі незалежным медыя і грамадзянскай супольнасці, а таксама “прыцягненне рэжыму Лукашэнкі да адказнасці за міжнародныя злачынствы, уключаючы вываз украінскіх дзяцей”.

Асаблівая ўвага была нададзеная “сінхранізацыі санкцыйнай палітыкі Лондана і ЕС”, а таксама “ролі Беларусі ў еўрапейскай бяспецы і залежнасці Мінска ад Расіі”.

Акрамя таго, Ціханоўская заклікала Вялікабрытанію разгледзець магчымасць далучэння да Міжнароднага гуманітарнага фонду і “падымаць беларускае пытанне на пляцоўках G7 і G20”, дзе Лондан прыме старшынства ў 2027 годзе.

Асобна Ціханоўская адзначыла два раўнды стратэгічных кансультацый, якія прайшлі паміж Вялікабрытаніяй і беларускімі дэмакратычнымі сіламі ў 2025 і 2026 гадах, запрашэнне Беларусі да ўдзелу ў саміце Еўрапейскай палітычнай супольнасці ў 2024 годзе, а таксама падтрымку беларускіх праваабарончых і грамадзянскіх ініцыятыў.

Звяртаецца ўвага, што ў 2024 годзе Вялікабрытанія абвясціла аб выдзяленні 2,5 млн фунтаў стэрлінгаў на падтрымку беларускіх праваабарончых і грамадзянскіх ініцыятыў.

Ціханоўская на сустрэчы са Стармерам высока ацаніла ролю брытанскага прэм’ера ў стварэнні “Кааліцыі ахвотных” для дапамогі Украіне, падкрэсліўшы, што беларускае грамадства “застаецца праеўрапейскім і антываенным”, а будучыня Беларусі і бяспека Украіны “непарыўна звязаныя”.

“Я ўдзячная прэм’ер-міністру Кіру Стармеру і Вялікабрытаніі за прынцыповую пазіцыю па Беларусі. Для нас вельмі важна, што Лондан працягвае падтрымліваць беларускае грамадства і не прызнае легітымнасць рэжыму Лукашэнкі. Падтрымка дэмакратычнай Беларусі — гэта ўклад у бяспеку ўсёй Еўропы. Беларусь не павінна заставацца ў цені Расіі ці быць разменнай манетай у міжнародных перамовах. Беларусы хочуць жыць у свабоднай, незалежнай і еўрапейскай краіне. Сёння нам важна, каб партнёры працягвалі падтрымліваць палітвязняў, незалежныя медыя, грамадзянскую супольнасць і ўсіх, хто захоўвае сувязь Беларусі з Еўропай”, — заявіла Ціханоўская па выніках сустрэчы.

Ціханоўская ўпершыню сустрэлася са Стармерам у сакавіку 2023 года, калі яго Лейбарысцкая партыя знаходзілася ў апазіцыі. Тады абмяркоўваліся пытанні санкцый, прыцягнення рэжыму Лукашэнкі да адказнасці, дапамогі дэмакратычнаму руху.

У ліпені 2024 года Ціханоўская правяла перамовы са Стармерам ужо як з прэм’ер-міністрам Вялікабрытаніі. “Абмеркавалі сітуацыю ўнутры Беларусі, праблему палітвязняў, фармалізацыю стасункаў паміж Вялікабрытаніяй і дэмакратычнымі сіламі Беларусі, падтрымку незалежных СМІ, сумесныя дзеянні на міжнароднай арэне, пытанні, з якімі сутыкаюцца беларусы ў Вялікабрытаніі“, — паведаміў тады “Позірку“ галоўны дарадца дэмлідара Франак Вячорка.

Палітыка

Палітыка

Стармер: Вызваленне Ціханоўскага — момант надзеі

22 чэрвеня, Позірк. "Гэта выдатная навіна і момант надзеі“, — так ахарактарызаваў выхад на волю Сяргея Ціханоўскага прэм'ер-міністр Вялікабрытаніі Кір Стармер. "Вызваленне Сяргея Ціханоўскага — гэта напамін, што дэмакратычныя каштоўнасці немагчыма замаўчаць“, — напісаў кіраўнік брытанскага кабінета ў Х (“Твітары“). …

Чытаць