У Віцебску дажджы падмылі грунт ля шматкватэрнага дома, жыхароў адсяляюць
8 чэрвеня, Позірк. Праз моцныя ападкі ля жылога дома па вул. Шрадэра ў Віцебску здарылася “ўсаджванне грунту на месцы правядзення земляных работ па пракладцы каналізацыйнай поліэтыленавай трубы”, паведаміла 8 чэрвеня прэс-служба Міністэрства па надзвычайных сітуацыях.
Паводле інфармацыі ведамства, ніхто не пацярпеў, цэласнасць падмурка дома не парушаная. “У мэтах бяспекі прынятае рашэнне па адсяленні жыхароў дома на час правядзення аднаўленчых работ, арыентавана да 1 сутак. Праводзіцца пакватэрны абход грамадзян, працуюць спецыялісты псіхалагічнай службы МНС”, — гаворыцца ў паведамленні.
Заяўлена, што спецыялізаваныя гарадскія службы ачышчаюць пад’езд да месца здарэння. Пасля там будуць выкладзеныя пліты, падсыпаны і ўмацаваны грунт. Стан падмурка кантралюецца.
На месцы здарэння працуюць сем спецыялістаў, задзейнічана чатыры адзінкі тэхнікі (ад МНС — чатыры і адна адпаведна).
Сабраная камісія па надзвычайных сітуацыях пры Віцебскім гарвыканкаме, каб высветліць прычыны здарэння і зрабіць “неабходныя захады па гарантаванні бяспекі людзей”.
Раней МНС паведамляла, што ў Віцебскай, Гомельскай, Мінскай і Магілёўскай абласцях на 8 чэрвеня абвешчаны аранжавы ўзровень небяспекі праз неспрыяльныя з’явы надвор’я. Белгідрамет прагназаваў навальніцы, моцныя дажджы, узмацненне ветру парывамі 15–20 м/с.
