14 чэрвеня, Позірк. Рэкордную за апошнія 985 дзён колькасць спробаў незаконнага пераходу мігрантаў з тэрыторыі Беларусі — 205 — зафіксавала 13 чэрвеня Дзяржаўная памежная ахова Латвіі, сведчыць праведзены “Позіркам“ аналіз масіву яе аператыўных звестак.
1 кастрычніка 2023 года колькасць спробаў склала 220. За мінулы перыяд (2 гады 8 месяцаў 11 дзён) найбольш напружанымі былі 3 чэрвеня і 16 траўня гэтага года (171 і 170 спробаў адпаведна).
З пачатку лета 2026 года Латвія паведаміла агулам пра 1.149 спробаў парушэння сваёй мяжы мігрантамі з трэціх краін, якія імкнуцца трапіць у Еўрасаюз праз Беларусь, з пачатку года — пра 5.603.
Нелегалы спрабуюць пранікнуць у Латвію 81 дзень запар (з 25 сакавіка).
