Літва цвёрда падтрымлівае санкцыі супраць Беларусі і РФ і выступае за ўзмацненне іх жорсткасці — Наўседа
16 чэрвеня, Позірк. “Рашуча асуджаючы” вайну Расіі супраць Украіны, а таксама гібрыдныя атакі супраць Літвы з тэрыторыі Беларусі, Вільнюс “цвёрда падтрымлівае міжнародныя санкцыі” супраць гэтых краін і выступае “за ўзмацненне іх жорсткасці”, заявіў літоўскі прэзідэнт Гітанас Наўседа, выступаючы 16 чэрвеня ў Сейме са штогадовым пасланнем.
“Наша краіна таксама не мае намеру ісці на саступкі, калі наўпрост закранаюцца інтарэсы нацыянальнай бяспекі”, — цытуе палітыка яго прэс-служба.
Паводле яго слоў, сёння Кіеў робіць вялікія высілкі для дасягнення “справядлівага, устойлівага і доўгатэрміновага міру, заснаванага на міжнародным праве”. Літва працягне аказваць Украіне “ўсебаковую вайсковую і гуманітарную дапамогу, падтрымліваць яе аднаўленне, рэканструкцыю і мадэрнізацыю, а таксама імкненне да членства ў Еўрасаюзе”.
Нагадаўшы пра нядаўнія выпадкі, калі ў Літве абвяшчалася паветраная трывога, Наўседа заклікаў усвядоміць, што краіна ўваходзіць “у новы небяспечны свет, у якім мір больш не з’яўляецца нечым, што само сабой зразумела,”, яе асяроддзе “імкнена мяняецца”, становіцца “ўсё менш еднасці і мірнага суіснавання”, а аўтарытарныя рэжымы “смялей уздымаюць галовы <…> з усімі наступствамі, якія з гэтага вынікаюць”.
“Мы жывем у небяспечнай блізкасці да вайны, — канстатаваў літоўскі прэзідэнт. — Украіна ўжо пяты год трывала абараняецца ад ваеннай агрэсіі Расіі, паступова перахапляючы ініцыятыву і ствараючы ўсё больш выклікаў для праціўніка. Тым не менш ўражальныя дасягненні ўкраінцаў, якім мы садзейнічаем сваёй падтрымкай, не прыносяць спакою. Мы не ведаем, ці не апынемся самі пад прыцэлам варожых сіл, якія імкнуцца выпрабаваць еднасць і згуртаванасць НАТО”.
Паводле слоў Наўседы, Літва з’яўляецца “мішэнню, у якую пастаянна ляцяць вялікія ці малыя стрэлы”, пастаянна “варожыя сілы” правяраюць яе “пільнасць і трываласць”.
“Мы жывем у перыяд, калі прамыя ваенныя пагрозы становяцца ўсё больш рэальнымі і ўжо пачынаюць парушаць мірнае жыццё жыхароў Літвы. Аднак і яны — толькі вярхушка айсберга, пад якой хаваецца яшчэ больш выклікаў, — заявіў ён. — Гібрыдная вайна супраць Літвы вядзецца не адзін год і нават не адно дзесяцігоддзе. На яе паслядоўна выдзяляюцца вялікія сродкі. І гэта не зменяць ніякія рэверансы ці добразычлівыя саступкі. Нас ненавідзяць за тое, што мы адважваемся быць свабоднымі і незалежнымі. Ненавідзяць за тое, што мы любім сваю свабоду і з годнасцю карыстаемся яе перавагамі. Ненавідзяць за тое, што мы самі ствараем свой дабрабыт, чаго не здольны зрабіць ніводзін без выключэння аўтакратычны рэжым”.
“Мы бачым накіраваную супраць Літвы нелегальную міграцыю. Бачым паветраныя шары кантрабандыстаў. Бачым акты тэрору і дыверсій. Штодня бачым вялікую колькасць злосці, жоўці, прапаганды і дэзінфармацыі, якую ў сацыяльных сетках распаўсюджваюць безаблічныя, бяздушныя, падробленыя акаўнты”, — дадаў палітык.
Наўседа заявіў, што верыць у рашучасць саюзнікаў па НАТО “садзейнічаць абароне Літвы”, а таксама ў тое, што краіна будзе сама дастаткова моцная, каб “мець магчымасць абараніць сябе”.
“Ужо сёлета мы дэманструем лідарства на ўзроўні ўсяго НАТО, выдзяляючы на абарону 5,38% ВУП, — падкрэсліў ён. — Веру, што мы будзем інвеставаць у сваю бяспеку не толькі да 2030 года, але і пазней. <…> Нам патрэбная паўнаскладовая нямецкая бранятанкавая брыгада ў Літве ўжо ў 2027 годзе. Патрэбная прыдатная інфраструктура для прыёму войскаў Злучаных Штатаў Амерыкі ды іншых саюзнікаў. Патрэбная эфектыўная супрацьпаветраная абарона, якая ўключае таксама абарону ад дронаў. Трэба больш сучаснай зброі і амуніцыі з доўгатэрміновым бачаннем вырабляць як мага больш тут, у Літве. Патрэбная нацыянальная дывізія і выдатна падрыхтаваны рэзерв. Патрэбная грамадзянская абарона з эфектыўнай сістэмай апавяшчэння і добра развітой сеткай укрыццяў і сховішчаў. Патрэбная падрыхтоўка да ўсеагульнага супраціву як да істотнага — вырашальнага — элемента стрымлівання”.
“На закупку ўзбраення і вайсковай тэхнікі Літва сёлета выдзеліць 1,7 мільярда еўра. На набыццё цяжкай тэхнікі нацыянальнай дывізіі і боепрыпасаў мы накіруем яшчэ больш за паўмільярда еўра з Фонду абароны. Гэта дазволіць папоўніць літоўскае войска новымі баявымі машынамі пяхоты, артылерыяй і асабліва важнымі сёння сістэмамі СПА, радарамі, сродкамі электроннай барацьбы, новымі магутнасцямі дронаш і барацьбы з дронамі. Толькі на СПА мы выдаткоўваем паўмільярда еўра, і закупкі адбываюцца тут і зараз. Ужо ў 2028 годзе мы атрымаем першыя нямецкія танкі Leopard, частка якіх будзе збірацца пад Каўнасам, ствараючы працоўныя месцы тут, у Літве”, — дадаў ён.
Паводле слоў Наўседы, Літва вучыцца ў “найлепшых у свеце спецыялістаў па вайне дронаў” — украінцаў, развівае двухбаковую супрацу з Украінай у сферы абароннай прамысловасці, “імкнучыся ўсебакова падрыхтавацца да выпрабаванняў будучыні”.
“Неад’емная частка нашых намаганняў — развіццё вайсковай інфраструктуры. Паралельна ўзводзяцца вайсковыя гарадкі ў Руднінкай і Кайрай, ідзе падрыхтоўка да пашырэння палігона ў Таўраге і абсталявання палігона імя Эміліі Плятэр у Капчамесцісе. Разам з саюзнікамі мы рыхтуемся пры неабходнасці рашуча дзейнічаць у Сувалкскім калідоры”, — падкрэсліў ён.
Літва накіравала Беларусі чарговую ноту пратэсту ў сувязі з парушэннем паветранай прасторы
15 чэрвеня, Позірк. Міністэрства замежных спраў Літвы 15 чэрвеня заявіла часоваму паверанаму ў справах Беларусі "рашучы пратэст" у сувязі са "шматлікімі парушэннямі паветранай прасторы" балтыйскай дзяржавы ў траўні і чэрвені. Паводле інфармацыі прэс-службы літоўскага знешнепалітычнага ведамства, гаворка пра выпадкі, калі …
