У Маларыцкім раёне гарэў камбайн — дзясятая з пачатку года адзінка тэхнікі на аб’екце АПК

18 чэрвеня, Позірк. Кормаўборачны камбайн КВК-800 “Палессе FS80-8″ (2020 года выпуску) пацярпеў у выніку пажару ў Маларыцкім раёне (Брэсцкая вобласць) 17 чэрвеня, гаворыцца ў штодзённай зводцы Міністэрства па надзвычайных сітуацыях.

Інцыдэнт здарыўся на тэрыторыі механізаванага двара каля аграгарадка Ляхаўцы. Агнём пашкоджаная кабіна сельгасмашыны.

Паводле праведзенага “Позіркам” аналізу даных МНС, у 2025 годзе з-за пажараў пацярпела або было знішчана па меншай меры 53 адзінкі тэхнікі. Гэта на 27,4% менш, чым за 2024 год (мінімум 73). Сёлета адзначана дзесяць падобных выпадкаў.

У Беларусі працягвае змяншацца колькасць асноўных відаў тэхнікі, машын і абсталявання ў сельскагаспадарчых арганізацыях, вынікае з праведзенага “Позіркам“ аналізу звестак Нацыянальнага статыстычнага камітэта.

Станоўчых тэндэнцый не назіраецца з пачатку 1990-х, у тым ліку з прыходам да ўлады Аляксандра Лукашэнкі ў 1994 годзе. За гады яго кіравання колькасць асноўных сельгасмашын зменшылася ўтрая.

Стала менш камбайнаў: збожжаўборачных — у 3,3 раза (з 24.017 на канец 1994-га да 7.228 на канец 2025-га), бульбаўборачных — у 16,9 раза (з 7.877 да 467), буракаўборачных — у 8,3 раза (з 1.654 да 200), кормаўборачных — у 2,6 раза (з 9.442 да 3.582), ільноўборачных — у 12,5 раза (з 3.599 да 287).

Колькасць трактароў у гаспадарках зменшылася ў 3,4 раза (з 116.942 да 34.138), грузавых аўтамабіляў — у 4,4 раза (з 66.336 да 15.011).

Даільных установак і агрэгатаў стала менш у 1,8 разы (з 16.121 да 8.769), бульбакапальнікаў — у 15,2 раза (з 10.742 да 709), зернеачышчальных машын — у 1,7 разы (з 9.929 да 5.795).

Яшчэ два паказчыкі прадстаўлена з 1995 года. За гэты час бульбасаджалак стала менш у 9,8 раза (з 7.613 да 776), зернеачышчальна-сушыльных комплексаў — амаль у 2 разы (з 3.869 да 1.973).