МУС прызнала Асацыяцыю беларусаў у Амерыцы “экстрэмісцкім фарміраваннем”

25 чэрвеня, Позірк. Арганізацыя “ABA Together (Association of Belarusians in America)” / “Асацыяцыя беларусаў у Амерыцы”, што дзейнічае ў ЗША, прызнаная “экстрэмісцкім фарміраваннем” на падставе рашэння Міністэрства ўнутраных спраў ад 25 чэрвеня, вынікае з адпаведнага пераліку, размешчанага на сайце ведамства.

Сцвярджаецца, што да “фарміравання” маюць дачыненне 17 чалавек: Марыя і Таццяна Астапенка, Антон Бялянскі, Эмілія Баркоўская-Сцепанчук, Вольга Бромэн, Філіп Гаўрышаў, Марыя Яфімава, Яўген Ждановіч, Анжаліка Зайцава, Глеб Івашкевіч, Кацярына Маліеўская, Віталь Самсонаў, Артур Сянько, Сяргей і Вольга Шалыга, Ганна Шарко і Аляксандр Янкоўскі.

У спісе прыводзяцца інтэрнэт-рэсурсы, на думку МУС, звязаныя з аб’яднаннем.

Асацыяцыя стала 373-й “экстрэмісцкай” супольнасцю ў пераліку, які вядзецца з верасня 2021 года.

Асацыяцыя беларусаў у Амерыцы (ABA) ёсць некамерцыйнай арганізацыяй, якая аб’ядноўвае беларусаў па ўсёй тэрыторыі ЗША.

Як адзначаецца на сайце арганізацыі, яе місія палягае ў тым, каб прасоўваць веды пра беларусаў Амерыкі і беларуска-амерыканскую супольнасць, яе гісторыю, дасягненні і ўнёсак у развіццё грамадства; прадстаўляць беларуска-амерыканскую супольнасць перад народам і ўрадам ЗША; садзейнічаць захаванню беларускай супольнасцю ЗША сваёй спадчыны, культуры і мовы; падтрымліваць Беларусь у яе імкненні да пабудовы моцнай грамадзянскай супольнасці і ажыццяўлення эканамічных, культурных і сацыяльных пераўтварэнняў.