Прэзідэнт Сербіі Вучыч: Мы не хацелі ўводзіць санкцыі супраць кіраўніцтва Беларусі

10 ліпеня, Позірк. Умовай актывізацыі перамоваў аб уступленні Сербіі ў Еўрасаюз з’яўляецца далучэнне да санкцый супраць Расіі, але нават у такім выпадку краіну не прынялі б адразу ў склад ЕС. Пра гэта заявіў сербскі прэзідэнт Аляксандар Вучыч у эфіры тэлеканала Pink.

“Ключавой умовай заўсёды з’яўляюцца санкцыі супраць Расіі. Гэта адзіная ўмова. Што тычыцца Расіі і Беларусі, паколькі мы не ўвялі тры чвэрці санкцый супраць Беларусі, мы [фактычна] не ўвялі іх супраць Беларусі”, — цытуе Вучыча расійскае агенцтва ТАСС.

“Мы не хацелі ўводзіць санкцыі супраць беларускага кіраўніцтва”, — дадаў прэзідэнт Сербіі.

Як кандыдат на ўступленне ў Еўрасаюз Бялград далучыўся да эканамічных санкцый супраць беларускіх уладаў. Вучыч дэкларуе палітычную лаяльнасць да Мінска, але ў той жа час не адмаўляецца ад кантактаў з беларускімі дэмакратычнымі сіламі.

Пры садзейнічанні Вучыча быў вызвалены рэжысёр Андрэй Гнёт, арыштаваны ў Бялградзе па запыце беларускіх уладаў.

Дыпламатычныя адносіны паміж Беларуссю і Сербіяй (правапераемніцай Югаславіі) былі ўстаноўлены 15 лістапада 1994 года.

Паводле звестак беларускага пасольства ў краіне, у 2024 годзе агульны тавараабарот паміж Беларуссю і Сербіяй склаў 131,3 млн.долараў (беларускі экспарт — 74,2 млн., імпарт — 57,1 млн.).

Гл. таксама:

Сербскія і беларускія чыноўнікі выказалі зацікаўленасць у далейшым супрацоўніцтве