У Смаленскай вобласці затрыманая беларуская машына з тонай ялавічыны, увезенай міма пунктаў кантролю

28 красавіка, Позірк. Аб затрыманні ў Смаленскай вобласці 27 красавіка беларускай аўтамашыны, на якой, абыходзячы афіцыйныя пункты кантролю, у Расію было ўвезена каля 1 т мяса ялавічыны, паведаміла 28 красавіка ўпраўленне Федэральнай службы па ветэрынарным і фітасанітарным наглядзе (Рассельгаснагляд) па Бранскай, Смаленскай і Калужскай абласцях РФ.

Паводле інфармацыі ведамства, пры правядзенні першаснага кантролю было ўстаноўлена, што “груз не прамаркіраваны, ветэрынарныя суправаджальныя дакументы адсутнічаюць, санітарныя нормы перавозкі прадукцыі жывёлагадоўлі не выкананыя“. Грамадзянін Беларусі, які кіраваў аўтамабілем, “не здолеў патлумачыць інспектарам Рассельгаснагляду паходжанне мяса і месца яго прызначэння“.

Адабраныя пробы мяса правяраюцца на прадмет выключэння хвароб жывёл, пасля атрымання вынікаў ялавічына “будзе ўтылізаваная ва ўстаноўленым парадку“.

За парушэнне правілаў перамяшчэння прадукцыі жывёлагадоўлі паміж краінамі Еўразійскага эканамічнага саюза перавозчык прыцягнуты да адміністрацыйнай адказнасці па ч. 2 арт. 10.8 КаАП РФ (парушэнне ветэрынарна-санітарных правілаў перавозкі, перагону або забою жывёл або правілаў нарыхтоўкі, перапрацоўкі, захоўвання ці рэалізацыі прадуктаў жывёлагадоўлі).

22 красавіка згаданае тэрытарыяльнае ўпраўленне Рассельгаснагляду паведаміла, што з пачатку 2026 года паблізу мяжы было спынена 20 транспартных сродкаў, якія рухаліся з Беларусі, абмінаючы пункты ветэрынарнага кантролю. Адзначалася, што ў гэтым транспарце расійскія і беларускія грамадзяне перавозілі мясную і малочную прадукцыю агульнай вагой больш за 10,5 т. Маркіроўка паказвала на тое, што прадукцыя вырабленая прадпрыемствамі Беларусі. Тавары набываліся ў Гомельскай і Магілёўскай абласцях і прызначаліся для продажу ў Бранскай вобласці.