ДТЗ у Гомельскай вобласці — адзін чалавек загінуў, сем пацярпела

21 ліпеня, Позірк. Пра смяротнае дарожна-транспартнае здарэнне ў Буда-Кашалёўскім раёне (Гомельская вобласць) паведамляе прэс-служба Міністэрства ўнутраных спраў.

Аварыя з удзелам аўтамабіляў “Рэно” і “Джэта” здарылася ў 10:00 21 ліпеня на 378-м кіламетры дарогі М-8 (мяжа РФ — Віцебск — Гомель — мяжа Украіны).

У выніку ДТЗ загінула 65-гадовая пасажырка “Рэно”. 41-гадовая кіроўца і мужчына (узрост высвятляецца), а таксама двое дзяцей (16 і 11 гадоў), якія знаходзіліся ў гэтай машыне, шпіталізаваны. Акрамя таго, у бальніцу дастаўлены 45-гадовы кіроўца “Джэты”, а таксама яго пасажыры — 53-гадовы мужчына і 12-гадовая дзяўчынка.

На месцы здарэння працуюць супрацоўнікі Дзяржаўтаінспекцыі, следча-аператыўная група, МНС, медыкі. Прычыны і абставіны высвятляюцца.

Колькасць загінулых у ДТЗ на тэрыторыі Беларусі за год зменшылася на 1,8% (з 434 у 2024-м да 426 у 2025-м), паказаў праведзены “Позіркам” аналіз даных Нацыянальнага статыстычнага камітэта.

Пры гэтым пазітыўная дынаміка (зніжэнне смяротнасці) адзначаная толькі ў Магілёўскай вобласці — у 1,8 раза (з 54 да 30).

Сітуацыя не змянілася ў Мінскай вобласці — 115 загінулых, Брэсцкай — 76, Гомельскай — 66.

Горшая дынаміка зафіксаваная ў Мінску — рост у 1,7 раза (з 14 да 24). Далей: Віцебская — на 6,2% (з 65 да 69), Гродзенская — на 4,5% (з 44 да 46).