Літоўскія памежнікі дасталі з ракі чарговы плыт з беларускімі цыгарэтамі, іх кошт перавышае 11 тыс. еўра

28 ліпеня, Позірк. Пра выяўленне ў памежнай рацэ Нярыс (у Беларусі — Вілія) партыі кантрабандных цыгарэт паведаміла Служба аховы дзяржаўнай мяжы Літвы (САДМ).

2.090 пачкаў цыгарэт NZ Gold з беларускімі акцызнымі маркамі перавозіліся па вадзе з дапамогай плыта, груз быў заўважаны пры дапамозе сістэмы відэаназірання ў Швенчонскім раёне, адзначае ведамства.

Цыгарэты былі абгорнуты ў чорную поліэтыленавую плёнку. Іх кошт склаў 11.411 еўра.

Паводле інфармацыі САДМ, груз быў спушчаны ў раку на беларускім баку.

Пачата дасудовае расследаванне. Адзначаецца, што за такое злачынства прадугледжаны штраф ці пазбаўленне волі да чатырох гадоў.

САДМ звяртае ўвагу, што апошні да гэтага выпадку кантрабандны плыт у Нярысе быў вылаўлены памежнікамі два месяцы таму. Як і тады, ведамства заявіла, што ягоныя супрацоўнікі з кантрабандай беларускіх цыгарэт па вадзе апошнім часам сутыкаюцца рэдка.