Сайт найбуйнейшага польскага інфармагенцтва атрымаў у Беларусі “экстрэмісцкі” статус
31 ліпеня, Позірк. Сайт найбуйнейшага польскага інфармацыйнага агенцтва PAP (Polska agencja prasowa; pap.pl) далучаны ў Беларусі да “экстрэмісцкіх матэрыялаў“.
Як вынікае з абноўленага спіса на сайце Міністэрства інфармацыі, рашэнне аб гэтым прыняў 28 ліпеня суд Горацкага раёна Магілёўскай вобласці.
Гэты крок беларускіх уладаў з’яўляецца “спробай абмежаваць доступ да дакладнай і незалежнай інфармацыі”, заявіў генеральны дырэктар РАР Марэк Блоньскі.
Паводле яго слоў, якія перадае агенцтва, супрацоўнікі “працягнуць асвятляць падзеі ў Беларусі ў адпаведнасці са стандартамі прафесійнай журналістыкі”.
“Гэтае рашэнне не зменіць нашы прынцыпы або метады работы, — падкрэсліў кіраўнік. — Пры гэтым мы з асаблівай адказнасцю ставімся да бяспекі нашых крыніц і атрымальнікаў у Беларусі”.
РАР прыводзіць каментар беларускага дэмакратычнага лідара Святланы Ціханоўскай, якая назвала рашэнне Мінска “прызнаннем працы РАР па распаўсюджванні дакладнай і незалежнай інфармацыі”: “Гэта знак таго, што ваша праца важная і даходзіць да беларусаў. І рэжым у чарговы раз дэманструе сваю слабасць і абсурднасць”.
У ліпені 2023 года стала вядома, што КДБ забараніў уезд у Беларусь на пяць гадоў карэспандэнту РАР Юстыне Прус, якая працавала ў краіне з 2016-га (на сёння яна кіраўніца міжнароднага аддзела агенцтва. — “Позірк“.).
Прус знаходзілася ў краіне падчас масавых пратэстаў пасля прэзідэнцкіх выбараў 2020 года, асвятляла міграцыйны крызіс, які пачаўся ў 2021-м. Яе запрашалі на асобныя мерапрыемствы з удзелам Аляксандра Лукашэнкі.
