Крымінальная справа распачатая па факце ДТЗ з трыма загінулымі ў Брэсце

1 жніўня, Позірк. Па факце смяротнага дарожна-транспартнага здарэння ў Брэсце ўзбуджана крымінальная справа, паведамляе Следчы камітэт.

Расследаванне праводзіцца паводле ч. 3 арт. 317 КК (парушэнне правілаў дарожнага руху асобай, якая кіруе транспартным сродкам, што пацягнула па неасцярожнасці смерць двух і больш асоб).

Паводле звестак СК, напярэдадні ўвечары 40-гадовы мужчына, кіруючы матацыклам “Хонда”, рухаўся па вуліцы Маскоўскай у абласным цэнтры ў кірунку выезду з горада. “На транспартным сродку таксама знаходзілася 32-гадовая жанчына-пасажыр”, — гаворыцца ў паведамленні.

Адзначаецца, што кіроўца не справіўся з кіраваннем і “дапусціў сутыкненне з мапедам, які рухаўся спадарожна, пад кіраваннем 45-гадовага жыхара Брэсцкага раёна”.

У выніку ДТЗ абодва кіроўцы і пасажыр матацыкла загінулі.

На месцы здарэння працавалі эксперты, супрацоўнікі ДАІ і следча-аператыўная група, у склад якой, як заяўляецца, увайшлі “найбольш дасведчаныя следчыя, якія спецыялізуюцца на расследаванні ДТЗ”.

Раней МУС паведамляла, што па ўказанні міністра ўнутраных спраў Івана Кубракова на месца здарэння адправіўся часова выконваючы абавязкі начальніка ДАІ Андрэй Гаркуша.