Беларус арыштаваны ў Варшаве на падставе падазрэння ў захоўванні і збыце наркотыкаў і псіхатропаў

6 жніўня, Позірк. Пра затрыманне ў Варшаве 42-гадовага грамадзяніна Беларусі, які падазраецца ў захоўванні буйных партый наркатычных сродкаў і псіхатропных рэчываў, а таксама іх збыце, паведаміла 6 жніўня паліцыя польскай сталіцы.

Паводле інфармацыі праваахоўнікаў, у мужчыны канфіскаваны мефедрон (сама меней 811 грамаў), марыхуана (35 г), грыбы з утрыманнем псіхаактыўных рэчываў (7 г), MDMA (2,5 г). Агульная вага канфіскаваных наркотыкаў і псіхатропаў перавысіла 850 г.

Паведамляецца, што беларусу выстаўленыя абвінавачанні ў захоўванні буйных партый наркатычных сродкаў і псіхатропных рэчываў, а таксама ў іх распаўсюдзе на тэрыторыі варшаўскага раёна Урсынаў.

На падставе хадайніцтва пракуратуры суд пастанавіў змясціць яго пад варту на 3 месяцы.