У Польшчы за кантрабанду цыгарэт затрыманыя дзевяць чалавек, у тым ліку чацвёра беларусаў

28 жніўня, Позірк. Пра затрыманне дзевяці чалавек, “маючых дачыненне да кантрабанды цыгарэт з Беларусі ў Польшчу з выкарыстаннем метэазондаў”, паведаміла прэс-служба Падляскага аддзялення Памежнай аховы краіны.

Сярод узятых пад варту — чацвёра грамадзян Беларусі, трое — Польшчы, двое — Літвы.

Было выяўлена 3,9 тыс. каробак з нелегальнымі цыгарэтамі на суму больш за 620 тыс. злотых (прыкладна 142,6 тыс. еўра).

У ходзе расследавання плануецца ўстанавіць іншых “прычынных да злачыннай дзейнасці”.

Агулам ад пачатку 2026 года супрацоўнікі рэгіянальнага аддзялення службы затрымалі 40 чалавек, якія займаліся кантрабандай цыгарэт з Беларусі ў Польшчу з выкарыстаннем метэаралагічных зондаў, гаворыцца ў рэлізе.

Раней паведамлялася, што 27 жніўня ў Падляскім ваяводстве Польшчы, якое мяжуе з Беларуссю, былі выяўлены чатыры кантрабандныя паветраныя шары з грузамі цыгарэт без польскіх акцызных марак. Паводле слоў прэс-сакратара паліцыі Падляскага ваяводства Томаша Крупы, гаворка ідзе пра “адны з самых буйных” партыі нелегальных цыгарэт, якія заляталі на тэрыторыю краіны.