Жыхар Мінска абвінавачаны ў адмаўленні генацыду беларускага народа

31 жніўня, Позірк. Пра завяршэнне расследавання крымінальнай справы аб адмаўленні генацыду беларускага народа паведаміла 31 жніўня прэс-служба Следчага камітэта.

Згодна з інфармацыяй ведамства, 39-гадовы жыхар Мінска ў кастрычніку 2025 года пракаментаваў у “Трэдс” адну з публікацый, прысвечаных гісторыі Другой сусветнай вайны, паставіўшы пад сумнеў існаванне плана “Ост” і “сам факт генацыду беларускага народа”.

Мужчына быў затрыманы ў выніку аператыўна-вышуковых мерапрыемстваў ГУБАЗіК і следчых.

“На допыце мужчына распавёў, што вырашыў размясціць падобны каментарый для прасоўвання галіны абмеркавання ў сацыяльнай сетцы з мэтай стварэння спрэчкі паміж карыстальнікамі — такім чынам хацеў заняць сябе, — гаворыцца ў паведамленні. — Пры гэтым мінчук паведаміў, што не знайшоў у інтэрнэце арыгінала плана “Ост”, аднак да афіцыйнай літаратуры не звяртаўся, бібліятэку не наведваў і мае толькі павярхоўнае ўяўленне пра гісторыю”.

Жыхару Мінска выстаўленае абвінавачанне паводле ч. 1 арт. 130² КК (адмаўленне генацыду беларускага народа ў інфармацыі, размешчанай у глабальнай камп’ютарнай сетцы інтэрнэт). На падставе санкцыі пракурора мужчына ўзяты пад варту.

У траўні СК паведамляў пра завяршэнне расследавання крымінальнай справы 56-гадовага жыхара сталіцы. Той, як сцвярджалася, таксама выявіў у “Трэдс” цыкл артыкулаў пра вайну і, “не пагадзіўшыся з напісаным, размясціў пад імі некалькі тэкставых каментарыяў з адмаўленнем існавання гітлераўскага плана “Ост” як аднаго з этапаў генацыду беларускага народа”.

Пераслед за адмаўленне генацыду беларускага народа набывае масавы характар.

Тэму “генацыду беларускага народа” ўлады пачалі актыўна прасоўваць каля пяці гадоў таму. У 2021 годзе быў прыняты закон “Аб генацыдзе беларускага народа”. Пад беларускім народам у кантэксце дакумента “разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

17 ліпеня 2023 года Лукашэнка падпісаў закон “Аб змяненні Крымінальна-працэсуальнага кодэкса”, які дазваляе пераследаваць памерлых у крымінальным парадку.

За “адмаўленне генацыду беларускага народа” арт. 130² КК прадугледжвае адказнасць у выглядзе пяці гадоў зняволення, за паўторнае парушэнне закона — ад трох да 10 гадоў пазбаўлення волі.

Незалежныя гісторыкі і эксперты лічаць, што ўлады выкарыстоўваюць гэтую тэму для дыскрэдытацыі апанентаў. Пра гэта, у прыватнасці, сведчыць змест кнігі “Генацыд беларускага народа”, якая выйшла пад рэдакцыяй на той момант генеральнага пракурора, а цяпер старшыні Вярхоўнага суда Андрэя Шведа. У ёй сцвярджаецца, што масавыя пратэсты супраць фальсіфікацыі вынікаў прэзідэнцкіх выбараў 2020 года з’яўляюцца спробай дзяржаўнага перавароту з выкарыстаннем нацысцкай ідэалогіі. Акрамя таго, да генацыду фактычна прыраўнаваны антысавецкі супраціў у першыя пасляваенныя гады.