Польшча да 9 снежня падаўжае абмежаванні на нізкавышынныя палёты ўздоўж мяжы з Беларуссю і Украінай
5 верасня, Позірк. Абмежаванні паветранага руху на вышыні да 3 км ва ўсходняй частцы Польшчы падаўжаюцца на перыяд з 10 верасня па 9 снежня 2026 года, вынікае з паведамлення Аператыўнага камандавання відаў Узброеных сіл гэтай краіны, на запыт якой прынятае адпаведнае рашэнне.
Упершыню абмежаванні на нізкавышынныя палёты ўздоўж мяжы з Беларуссю і Украінай Польшча ўвяла 10 верасня 2025 года — па 9 снежня 2025-га (да таго аналагічныя абмежаванні дзейнічалі на ўкраінскім кірунку). Пасля яны падаўжаліся на перыяды з 10 снежня 2025 года па 9 сакавіка 2026-га, з 10 сакавіка па 9 чэрвеня 2026-га, з 10 чэрвеня па 9 верасня.
Ваеннае ведамства падкрэсліла, што чарговыя абмежаванні, як і раней, “не распаўсюджваюцца на пасажырскія самалёты, якія выконваюць палёты на большай вышыні”.
“У начны час <…> дзейнічае поўная забарона на палёты, за выключэннем палётаў ваенных паветраных суднаў, а таксама ўзгодненых з Цэнтрам паветраных аперацый — Камандаваннем паветранага кампанента ўзлётаў і пасадак на аэрадроме Дэпултычэ-Крулеўске”, — гаворыцца ў паведамленні.
У дзённы час выключэнні распаўсюджваюцца на пілатаваныя паветраныя судны з пададзенымі планамі палётаў, спраўнымі транспондарамі і сталай радыёсувяззю з дыспетчарскай службай; вайсковую авіяцыю; спецыяльныя палёты па сігналах GARDA і ALPHA SCRAMBLE; паветраныя судны са спецыяльнымі статусамі HEAD, STATE, SAR, HOSP, MEDEVAC і FFR — дзяржаўныя і асабліва важныя рэйсы, пошукава-выратавальныя, медыцынскія, медыка-эвакуацыйныя і супрацьпажарныя палёты; грамадзянскія беспілотнікі — пры ўмове, што яны не ўваходзяць у зоны ідэнтыфікацыі СПА Беларусі і Украіны.
У верасні 2025 года Польшча прыняла рашэнне пра стварэнне беспалётнай зоны ў сувязі з уварваннем у польскую паветраную прастору расійскіх дронаў, а таксама з расійска-беларускімі вучэннямі “Захад-2025”.
