Лукашэнка чакае “паломніцтва беларусаў у Маскву” пасля будаўніцтва хуткаснай чыгункі

6 кастрычніка, Позірк. Аляксандр Лукашэнка, як паведамляе яго прэс-служба, закрануў тэму будаўніцтва чыгуначнай высакахуткаснай магістралі паміж Масквой і Мінскам 5 кастрычніка на сустрэчы з кіраўніком расійскага “Банка ПСБ” Пятром Фрадковым.

“Я вельмі станоўча ўспрыняў нядаўняе прынятае ў Расіі рашэнне аб будаўніцтве [магістралі], — сказаў ён. — Гэта вельмі цікава для нашых людзей. Я ўжо гэта называю паломніцтвам нейкім беларусаў у Маскву. Асабліва моладзі”.

Мемарандум аб супрацоўніцтве па будаўніцтве гэтай ВСМ падпісалі 1 кастрычніка ў Мінску міністр транспарту і камунікацый Беларусі Аляксей Ляхновіч і міністр транспарту Расіі Андрэй Нікіцін.

Чакаецца, што магістраль будзе мець працягласць каля 700 км. Па папярэдніх ацэнках Мінтранса РФ, цягнік зможа пераадольваць адлегласць паміж сталіцамі прыкладна за тры гадзіны з невялікім замест цяперашніх васьмі.

Прагназуемы пасажырапаток ацэньваецца расійскім бокам да 5,8 млн чалавек у год.

“Банк ПСБ” (раней — “Прамсувязьбанк”) уваходзіць у пералік сістэмна значных крэдытных арганізацый, а таксама ў першую пяцёрку найбуйнейшых банкаў краіны па аб’ёме актываў.

У лютым 2018 года Дзяржаўная дума РФ прыняла папраўкі ў заканадаўства аб пераходзе гэтай фінансава-крэдытнай установы ў статус абароннага банка.

У снежні 2019-га Уладзімір Пуцін падпісаў закон аб надзяленні “Банка ПСБ” паўнамоцтвамі апорнага банка па абслугоўванні абаронна-прамысловага комплексу.