6 кастрычніка, Позірк. Прыярытэтам старшынства Літвы ў Савеце Еўрасаюза (першая палова 2027 года) стане ўключэнне пытанняў бяспекі і аховы межаў у асноўны парадак дня дыскусій ЕС, заявіў міністр унутраных спраў гэтай балтыйскай краіны Марцінас Катэлінас 5 кастрычніка на сустрэчы са сваім польскім калегам Марцінам Кервіньскім.
Паводле інфармацыі Памежнай аховы Польшчы, сустрэча адбылася ў Будзіску на паўночным усходзе краіны, дзе месціцца буйны аўтамабільны пункт пропуску на мяжы з Літвой.
Катэлінас адзначыў, што ва ўмовах “гібрыднага крызісу” Варшава і Вільнюс гавораць “адным голасам”. Чыноўнік таксама падкрэсліў, што Польшча застаецца лідарам у сферы аховы межаў.
Паведамляецца, што міністры абмеркавалі бяспеку на мяжы, супрацьдзеянне нелегальнай міграцыі, гібрыдныя пагрозы і каардынацыю дзеянняў на ўзроўні ЕС. Суразмоўцы “прыйшлі да адзінага меркавання, што міграцыйны ціск, якім кіруюць усходнія суседзі, змяніў свой характар і стаў больш агрэсіўным”, і ў гэтым кантэксце абмеркавалі “такія канкрэтныя пытанні, як эфектыўная рэадмісія і працэдуры вяртання”.
На сустрэчы прысутнічалі прадстаўнікі памежных службаў абедзвюх краін, што “дазволіла абмеркаваць механізмы каардынацыі працы службаў”, гаворыцца ў паведамленні.
Праведзены “Позіркам” аналіз даных памежных ведамстваў еўрапейскіх дзяржаў паказаў, што ад пачатку года суседнія краіны ЕС спынілі 14,1 тыс. спробаў мігрантаў нелегальна перасекчы мяжу з боку Беларусі. Больш за ўсё на латвійскім участку мяжы — 11,9 тыс.; на літоўскім — 1,7 тыс., польскім — каля паўсотні.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, бо тых туды нібыта “паклікалі”, а сам ЕС “душыць” Мінск санкцыямі.
