Мінінфарм Беларусі абмежаваў доступ да сайта інфармагенцтва “РБК-Украіна” і кіеўскага партала навін Inforesist

4 сакавіка, BPN. Міністэрства інфармацыі Беларусі абмежавала доступ да сайта ўкраінскага інфармацыйнага агенцтва “РБК-Украіна” і заснаванага ў Кіеве партала Inforesist.

“3 сакавіка 2022 года Мінінфармам прынята рашэнне аб абмежаванні доступу да ўкраінскіх інтэрнэт-рэсурсаў rbc.ua і inforesist.org, на якіх выяўлены шматлікія факты размяшчэння экстрэмісцкіх матэрыялаў у парушэнне артыкула 38 Закона аб СМІ, — заявілі ў міністэрстве. — Ва ўмовах актыўнага распаўсюджвання розных фэйкаў пра падзеі ва Украіне Мінінфарм чарговы раз просіць грамадзян Беларусі выконваць інфармацыйную гігіену і выбарча падыходзіць да выбару інфармацыйных крыніц”.

Інфармагенцтва “РБК-Украіна” было створана ў 2006 годзе як мясцовае падраздзяленне расійскага “Расбізнэскансалтынг” (РБК). У 2012 годзе агенцтва “РБК-Украіна” было выкупленае і стала самастойным медыя.

Партал Inforesist створаны “групай энтузіястаў”, якія пішуць “толькі пра найважнейшыя падзеі” і раскрываюць “самыя важныя тэмы аб тым, што адбываецца ва Украіне і свеце”.

Як паведамлялася, 1 сакавіка Мінінфарм з аналагічнай аргументацыяй абмежаваў доступ да ўкраінскіх інфармацыйных рэсурсаў “Гордон” (створаны вядомым журналістам Дзмітрыем Гардонам) і “Обозреватель”.