Белстат: Аб’ём грузаперавозак за сем месяцаў 2023 года знізіўся на 22,4% да аналагічнага перыяду 2022-га

17 жніўня, Позірк. У Беларусі аб’ём грузаперавозак у студзені — ліпені 2023 года знізіўся на 22,4% да аналагічнага перыяду 2022-га, сведчаць звесткі Нацыянальнага статыстычнага камітэта.

Пасажыраабарот транспарту (вылічаецца шляхам множання колькасці пасажыраў на адлегласць перавозак) вырас на 11,3%, перавезена на 3,1% чалавек больш.

У студзені зніжэнне (у гадавым вымярэнні) грузаперавозак склала 33%, у студзені — лютым — 33,6%, студзені — сакавіку — 32%, студзені — красавіку — 30,3%, студзені — траўні — 27,2%, у студзені — чэрвені — 24,2%.

Апошнія чатыры гады ў Беларусі грузаабарот транспарту нязменна змяншаўся: у 2019 годзе — на 5,8%, 2020-м — на 5,9%, 2021-м — на 3,6%, 2022-м — на 25,4% (агулам — на 36,2%).

Раней аналітыкі Еўразійскага банка развіцця тлумачылі значнае скарачэнне грузаабароту ў Беларусі “парушэннем транспартна-лагістычных ланцужкоў, закрыццём паўднёвай часткі паветранай прасторы Расіі, спыненнем перавозак у зносінах з Украінай”.

27 траўня міністр эканомікі Аляксандр Чарвякоў заявіў, што транспартная галіна Беларусі аднаўляецца: “З-за санкцый прыйшлося вельмі хутка і аператыўна перанакіроўваць патокі з заходняга вектара на ўсходні і паўднёва-ўсходні”.

Чыноўнік сцвярджаў, што “ідзе адаптацыя” транспартных калідораў Поўнач — Поўдзень, Захад — Усход.

Паводле слоў міністра, грузаперавозкі “штомесячна дадаюць” каля 5%. За год Беларусь “па перавозках наблізіцца да 100%”, адзначаў ён, “бо вялікую долю (больш за 30%) у транспарце займае менавіта перапампоўка газу і нафты”.

Па чыгуначных і аўтамабільных грузапатоках “мы вельмі блізка наблізімся да 100%”, дадаў Чарвякоў.

Гл. таксама:

Пасля закрыцця Літвой двух пагранпераходаў здольнасць беларускіх пунктаў прапускаць транспарт у бок ЕС знізіцца на 4,7%