Генпракуратура ў 2022 годзе выявіла 34 карупцыйныя злачынствы ў сістэме Мінлясгаса

20 студзеня, BPN. Генеральная пракуратура сумесна з пракуратурамі абласцей і Мінска выявіла парушэнні заканадаўства аб барацьбе з карупцыяй у сістэме Мінлясгаса, паведаміла прэс-служба нагляднага ведамства.

“У 2022 годзе ў сістэме лясной гаспадаркі выяўлены 34 карупцыйныя злачынствы, учыненыя ў тым ліку службовымі асобамі апарата Мінлясгаса. Памер урону, устаноўленага па крымінальных справах аб злачынствах карупцыйнай накіраванасці, перавысіў 1,7 млн рублёў”, — зазначаецца ў рэлізе.

Найбольш уразлівымі названы “рэалізацыя драўніны суб’ектам гаспадарання, закупка абсталявання і тэхнікі за кошт уласных сродкаў, забеспячэнне захаванасці леса- і піламатэрыялаў, іншай маёмасці”.

Праверка выявіла таксама факты драбнення прадмета куплі, няправільнага выбару віду закупак або ўхілення ад правядзення канкурэнтных працэдур, няправільнага вызначэння ўмоў допуску тавараў замежнага паходжання, фарміравання лотаў для суб’ектаў малога і сярэдняга прадпрымальніцтва, парушэнні пры падрыхтоўцы дакументацыі і размяшчэнні ў адкрытым доступе звестак аб закупках.

Пракуроры адзначылі нізкую эфектыўнасць антыкарупцыйных камісій у шэрагу ўстаноў галіны, якая выяўлялася ў “разглядзе вузкага кола пытанняў і прыняццем аднатыпных рашэнняў”.

У многіх лясгасах зафіксаваны канфлікт інтарэсаў, звязаны з работай у адной арганізацыі мужа і жонкі і блізкіх сваякоў, выкарыстанне службовага транспарту ў асабістых мэтах, недакладнасць звестак у дэкларацыях аб даходах і маёмасці работнікаў.

Міністр лясной гаспадаркі Віталь Дрожжа быў звольнены 5 траўня 2022 года “ў сувязі са здзяйсненнем правіны, несумяшчальнай са знаходжаннем на дзяржаўнай службе”. 12 студзеня гэтага года прыгавораны да 7,5 года пазбаўлення волі за атрыманне хабару ў асабліва буйным памеры.