Байдэн у Вільнюсе сустрэўся з Ціханоўскай

13 ліпеня, BPN. Дэмлідар Святлана Ціханоўская сустрэлася 12 ліпеня ў Вільнюсе з прэзідэнтам ЗША Джо Байдэнам, паведамляецца ў яе тэлеграм-канале.

Сустрэча адбылася адразу пасля выступлення прэзідэнта ў Вільнюскім універсітэце.

Паводле словаў Ціханоўскай, яна данесла да Байдэна, што беларусы “працягваюць змагацца за вызваленне сваёй краіны”.

“Я рада, што ў нас атрымліваецца непублічна пагаварыць аб тым, што нам сапраўды важна. Беларусы могуць разлічваць на падтрымку ЗША”, — пракаментавала палітык.

Ніколі не здавацца і працягваць змагацца за “лепшае заўтра” заклікаў народы Беларусі, Малдовы і Грузіі падчас свайго выступу ў Вільнюскім універсітэце Байдэн.

“Многія з вас ведаюць, як ніхто, наколькі каштоўная магчымасць вызначаць сваю будучыню. Гэта каштоўна для людзей паўсюль, не толькі ва Украіне. У Беларусі, Малдове, Грузіі і па ўсім свеце, дзе людзі працягваюць змагацца за тое, каб іх галасы былі пачуты”, — сказаў амерыканскі прэзідэнт.

28 ліпеня 2021 года Байдэн і Ціханоўская правялі перамовы ў Вашынгтоне. 26 сакавіка 2022 года прэзідэнт ЗША патэлефанаваў ёй, знаходзячыся на борце свайго самалёта перад вылетам з Варшавы.