Беларусь далучылася да 11 пагадненняў у рамках уступлення ў ШАС
4 студзеня, Позірк. У рамках уступлення ў Шанхайскую арганізацыю супрацоўніцтва (ШАС) Беларусь далучылася да 11 міжнародных пагадненняў. Адпаведная пастанова Савета міністраў апублікаваная 4 студзеня на Нацыянальным прававым інтэрнэт-партале.
Гаворка ідзе аб пагадненнях аб асноўных мэтах і напрамках рэгіянальнага эканамічнага супрацоўніцтва і запуску працэсу па стварэнні спрыяльных умоў у галіне гандлю і інвестыцый, аб тэхнічнай абароне інфармацыі ў рэгіянальнай антытэрарыстычнай структуры ШАС, аб супрацоўніцтве ў галіне культуры, аховы аб’ектаў культурнай спадчыны, сродкаў масавай інфармацыі, сельскай гаспадаркі, аховы здароўя, навукова-тэхнічнай, міжбанкаўскай сферах.
Таксама Беларусь далучылася да пагаднення паміж мытнымі службамі аб супрацоўніцтве ў галіне падрыхтоўкі і павышэння кваліфікацыі службовых асоб мытных органаў і пратакола да яго, падпісанага ў Шанхаі 28 траўня 2002 года.
“Міністэрству замежных спраў накіраваць апавяшчэнні аб далучэнні Рэспублікі Беларусь да міжнародных дамоваў у рамках Шанхайскай арганізацыі супрацоўніцтва”, — адзначаецца ў пастанове.
Раней Беларусь далучылася да асноўных міжнародных дагавораў і пагадненняў Шанхайскай арганізацыі супрацоўніцтва. Адпаведны закон Аляксандр Лукашэнка падпісаў 7 ліпеня 2023 года.
Заяўлялася, што Беларусь далучаецца да 22 міжнародных дамоваў у рамках ШАС, уключаючы папраўкі да іх, пачынаючы з Хартыі Шанхайскай арганізацыі супрацоўніцтва.
Пра тое, што Беларусь можа ўступіць у ШАС да наступнага саміту арганізацыі, які пройдзе ў Астане (Казахстан) у ліпені 2024 года, 4 ліпеня паведаміў неафіцыйны тэлеграм-канал прэс-службы Лукашэнкі са спасылкай на кіраўніка Міністэрства замежных спраў Сяргея Алейніка.
Паводле слоў Алейніка, мемарандум аб абавязацельствах Беларусі ў працэсе далучэння да ШАС у якасці паўнапраўнай дзяржавы-члена падпісаны ўсімі краінамі, якія ўваходзяць у яе.
З 2010 года ў Беларусі быў статус партнёра Шанхайскай арганізацыі супрацоўніцтва, з 2015-га — назіральніка.
У ліпені 2022 года Мінск падаў заяўку на ўступленне ў ШАС. У верасні прэзідэнт Узбекістана Шаўкат Мірзіёеў паведаміў на саміце арганізацыі, што пачалася працэдура надання Беларусі статусу паўнапраўнага чальца.
Шанхайская арганізацыя супрацоўніцтва была створана ў 2001 годзе. Дэкларацыю аб яе фарміраванні падпісалі кіраўнікі Казахстана, Кітая, Кыргызстана, Расіі, Таджыкістана і Узбекістана. Пазней да арганізацыі далучыліся Індыя, Іран, Пакістан.