Лукашэнка: Да прэзідэнцкіх выбараў у Беларусі рыхтуюцца і на Усходзе, і на Захадзе

5 студзеня, Позірк. Аб недапушчальнасці “фармалізму і разгільдзяйства” заявіў Аляксандр Лукашэнка 5 студзеня падчас нарады аб асноўных напрамках работы па ўдасканаленні якасці ў 2024 годзе і Знаку якасці, паведаміла яго прэс-служба.

Аляксандр Лукашэнка папярэдзіў чыноўнікаў аб тым, што новы год “будзе асаблівы”.

“Зразумела, што напружанне будзе неймавернае: да прэзідэнцкіх выбараў у Беларусі рыхтуюцца ўсе — і на Усходзе, і на Захадзе. Мэты розныя. Вы людзі адукаваныя, таксама гэта разумееце. Але мы павінны перасягнуць сябе. Каб гэта зрабіць, не павінна быць фармалізму і разгільдзяйства”, — заявіў ён.

Лукашэнка зазначыў, што “пры ўсім тым станоўчым, што ў нас ёсць і што не адбярэш у нас, разгільдзяйства і фармалізму (нешта для галачкі правялі, адзначылі — усё добра) быць не павінна”.

“І не будзе, гэта я вам абяцаю. Таму настройвайцеся з першых дзён гэтага года на цяжкую, цяжкую працу”, — падкрэсліў ён.

У 2024 годзе ўпершыню ў Беларусі пройдуць аб’яднаныя выбары ў Палату прадстаўнікоў і мясцовыя рады. Адзіны дзень галасавання прызначаны на 25 лютага. На працягу 60 дзён пасля яго адбудзецца першае паседжанне Ўсебеларускага народнага збору ў новым статуце.

У 2025 годзе запланаваны сёмыя ў гісторыі краіны прэзідэнцкія выбары. Папярэднія, якія адбыліся 9 жніўня 2020 года, выклікалі доўгатэрміновую хвалю масавых пратэстаў і палітычны крызіс. Рэпрэсіі ўладаў пасля іх працягваюцца да гэтага часу.

З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.