Лукашэнка ў храме на Каляды назваў галоўнай падзеяй наступнага года прэзідэнцкія выбары
7 студзеня, Позірк. 2024 год “будзе вельмі няпростым”, заявіў Аляксандр Лукашэнка 7 студзеня падчас наведвання храма Святога прарока Іаана Прадцечы ў аграгарадку Шаршуны Мінскага раёна.
“На нас будуць трэніравацца. І нам трэба выдужаць. Будуць трэніравацца да будучых прэзідэнцкіх выбараў. І нам трэба звярнуць асаблівую ўвагу на моладзь, якая не бачыла складаных часоў і ў савецкі перыяд, і пасля распаду Савецкага Саюза”, — цытуе Лукашэнку яго прэс-служба.
Мінулы 2023 год, паводле яго слоў, таксама, “як і ўсе гады цяперашняй пяцігодкі, пачынаючы з 2020-га”, быў “няпростым”.
“Мы з Года міру і стварэння (без свету не можа быць стварэння) пераходзім у Год якасці. Нам трэба гэтае мірнае, спакойнае беларускае жыццё на гэтым маленькім астраўку, дзе мы сёння жывем, напоўніць высокай якасцю”, — сказаў Лукашэнка.
“Нам трэба зрабіць усё, каб мы дастойна пражылі гэты год і, падышоўшы да галоўнай падзеі (выбараў. — “Позірк”.), дастойна паказалі сябе”, — падкрэсліў ён.
Лукашэнка трэці раз цягам тыдня звяртаецца да тэмы будучых прэзідэнцкіх выбараў.
“Будзем гаварыць усё сумленна і шчыра, каб нас да чарговых прэзідэнцкіх выбараў праз год не папракалі, што мы там недзе юлілі-круцілі, няпраўду гаварылі і наогул улада нашая ні да чаго не прыдатная, як цяпер ужо пачынаюць гэта раскручваць”, — заявіў ён 4 студзеня падчас кадравых прызначэнняў.
Аб тым, што да электраальнай кампаніі ў Беларусі “рыхтуюцца і на Усходзе, і на Захадзе”, ён сказаў 5 студзеня падчас нарады аб асноўных напрамках работы па ўдасканаленні якасці.
У 2024 годзе ўпершыню ў Беларусі пройдуць аб’яднаныя выбары ў Палату прадстаўнікоў і мясцовыя рады. Адзіны дзень галасавання прызначаны на 25 лютага. На працягу 60 дзён пасля яго адбудзецца першае паседжанне Ўсебеларускага народнага збору ў новым статуце.
У 2025 годзе запланаваны сёмыя ў гісторыі краіны прэзідэнцкія выбары. Папярэднія, якія адбыліся 9 жніўня 2020 года, выклікалі доўгатэрміновую хвалю масавых пратэстаў і палітычны крызіс. Беспрэцэдэнтныя па сваім маштабе рэпрэсіі ўладаў пасля іх працягваюцца да гэтага часу.
З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.