Генпракурор Швед заклікаў працоўных засцерагаць калег ад карупцыі

17 студзеня, Позірк. Асноўны ўпор у барацьбе з карупцыяй “робіцца на прафілактыку”, заявіў генеральны пракурор Андрэй Швед, выступаючы 17 студзеня перад работнікамі Мінскага трактарнага завода.

“Наша мэта не ў тым, каб узбудзіць крымінальную справу, а [каб] не дапусціць сістэмнай праявы карупцыі”, — сцвярджае чыноўнік, чые словы прыводзіць прэс-служба нагляднага органа.

Швед заявіў, што барацьбу з гэтай з’явай “аслабляць небяспечна, асабліва на дзяржаўным узроўні”. Пры гэтым ён адзначыў, што супрацьдзеянне карупцыі — гэта “не толькі праца праваахоўнага блока, але і задача для ўсёй грамадскасці, у тым ліку працоўных калектываў”.

“Важна зберагчы калегу, калі ён страціў прававы арыенцір і ў яго працы сталі заўважныя карупцыйныя праявы. Менавіта людзі, якія працуюць побач, могуць аказаць неацэнную дапамогу ў прадухіленні гэтай негатыўнай сацыяльнай з’явы”, — сказаў генпракурор.

Раней Швед заяўляў, што наглядным органам у 2022 годзе “актывізавана праца праваахоўнага блока” па выяўленні фактаў карупцыі. Летась 28 снежня на сайце Генпракуратуры была апублікаваная стратэгія па барацьбе з гэтай з’явай, якая сярод іншага прадугледжвае “стымуляванне асоб паведамляць пра факты карупцыі”.

У лютым 2023 года міжнародная няўрадавая арганізацыя Transparency International выпусціла чарговы “Індэкс успрымання карупцыі”, паводле якога Беларусь разам з Калумбіяй і Малдовай заняла 91-е месца са 180.

Аляксандр Лукашэнка прыйшоў да ўлады ў сярэдзіне 1990-х гадоў шмат у чым дзякуючы вобразу змагара з карупцыяй, перыядычна ён вяртаецца да гэтай тэмы. У сувязі з тым, што праблема не вынішчаецца, некаторыя эксперты мяркуюць, што гэта папулісцкі прыём, з дапамогай якога Лукашэнка спрабуе вярнуць сабе былы вобраз.

Гл. таксама:

“Не дазволім нажывацца”. Лукашэнка зноў асядлівае папулізм (на рускай мове)