ДПК прагназуе 40-працэнтнае змяншэнне штосутачнай колькасці грузавікоў, якія ўязджаюць у Літву
29 лютага, Позірк. Дзяржаўны памежны камітэт прагназуе змяншэнне штосутачнай колькасці грузавікоў, якія фактычна запускаюцца на літоўскую тэрыторыю сумежным бокам, прыкладна на 40%, паведаміла прэс-служба ведамства напярэдадні закрыцця Вільнюсам пунктаў пропуску Лаварышкес (з беларускага боку Катлоўка) і Райгардас (Прывалка).
“Літоўскі кірунак застаецца самым загружаным для грузавога транспарту на мяжы Беларусі і краін Еўрасаюза. Нягледзячы на гэта, сумежны бок мэтанакіравана працягвае ствараць перашкоды ў перасячэнні мяжы грузаперавозчыкам і ўласным грамадзянам”, — заявіў ДПК.
Паводле сцвярджэння ведамства, “на падставе забеспячэння выканання міжнародных санкцый і зніжэння рызык бяспекі літоўскія ўлады пераследуюць мэту скарачэння патоку грамадзян, транспарту і тавараў праз літоўска-беларускую мяжу”.
Падобнае рашэнне, лічыць ДПК, прывядзе да пераразмеркавання транспартных патокаў і істотнага росту нагрузкі на пакінутыя пункты пропуску Мядзінінкай (Каменны Лог) і Шальчынінкай (Беняконі).
“За мінулыя суткі супрацоўнікі чатырох функцыянуючых літоўскіх памежных пераходаў прапусцілі на сваю тэрыторыю 32% фур ад нормы. З іх 13% транспарту прайшло праз пункты пропуску Лаварышкес (Катлоўка) і Райгардас (Прывалка), якія сумежны бок плануе закрыць”, — паведаміла ведамства.
21 лютага ўрад Літвы прыняў рашэнне аб закрыцці з 1 сакавіка памежных пераходаў Лаварышкес і Райгардас для вырашэння праблем нацыянальнай бяспекі, барацьбы з кантрабандай і парушэннем міжнародных санкцый.
Такім чынам, на мяжы з Беларуссю працягнуць працаваць два пункты пропуску з шасці: Мядзінінкай (Каменны Лог) і Шальчынінкай (Беняконі). КПП Шумскас (Лоша) і Цвярачус (Відзы) былі зачыненыя 18 жніўня 2023 года.
Міністры таксама падтрымалі прапанову абмежаваць пасадку і высадку пасажыраў на чыгуначным памежным пункце Кяна, каб вырашыць праблему пасажыраў транзітных цягнікоў у Калінінград, якія высаджваюцца ў Літве з візамі краін Еўрасаюза.
Акрамя таго, урад прыняў рашэнне прыпыніць рух пешаходаў і веласіпедыстаў праз КПП Мядзінінкай і Шальчынінкай, а таксама паступова скараціць колькасць дазволаў, якія выдаюцца беларускім і літоўскім перавозчыкам, якія ажыццяўляюць рэгулярныя міжнародныя аўтобусныя пасажырскія перавозкі паміж краінамі.
