Польшча прапануе ЕС увесці забарону на ўвоз сельгаспрадукцыі і харчавання з Беларусі

4 сакавіка, Позірк. Прэм’ер-міністр Польшчы Дональд Туск падчас прэс-канферэнцыі ў Вільнюсе 4 сакавіка заявіў пра намер ініцыяваць увядзенне “поўных санкцый” на ўвоз у Еўрасаюз сельскагаспадарчых і харчовых тавараў з Беларусі і Расіі, паведамляе партал onet.pl.

Пра гэта Туск паведаміў па выніках перамоваў з прэзідэнтам і прэм’ер-міністрам Літвы Гітанасам Наўседам і Інгрыд Шыманітэ.

Паводле слоў польскага прэм’ера, “агульнаеўрапейскае рашэнне [аб увядзенні такіх санкцый] будзе непараўнальна больш эфектыўным, чым асобныя рашэнні краін рэгіёну”. “Гаворка ідзе пра тое, каб зрабіць санкцыі больш рэалістычнымі і ўзмацніць іх у сувязі з нападам Расіі на Украіну і супрацоўніцтвам Беларусі з РФ”, — сказаў Туск.

Акрамя гэтага, дадаў ён, неабходная “больш эфектыўная” абарона адпаведных рынкаў Польшчы, Літвы і іншых краін ЕС.

“Адной з галоўных задач” Туск таксама назваў “разблакаванне магчымасці экспарту ўкраінскай прадукцыі ў трэція краіны”, які цяпер абцяжараны праз забастоўкі польскіх фермераў на мяжы з Украінай.

25 студзеня пасля масавых затрыманняў у Беларусі сваякоў палітвязняў і былых палітвязняў МЗС Польшчы заявіла, што “наступны пакет санкцый супраць Мінска павінен быць прыняты як мага хутчэй”. За мінулы з той пары час ЕС увёў 13-ы пакет санкцый, прымеркаваны да другой гадавіны расійскага ўварвання ва Украіну. У пакет уключаныя беларускія кампаніі і фізічныя асобы, якія аказваюць падтрымку расійскім узброеным сілам, а таксама 15 чалавек і 2 юрыдычныя асобы, “датычныя да дэпартацыі і вайсковай ідэалагічнай апрацоўкі ўкраінскіх дзяцей, у тым ліку ў Беларусі”.

26 лютага Савет ЕС прыняў рашэнне падоўжыць на год, да 28 лютага 2025-га, “дзеянне абмежавальных захадаў, звязаных з унутранымі рэпрэсіямі ў Беларусі і падтрымкай рэжымам [Аляксандра Лукашэнкі] вайны Расіі супраць Украіны”. У прэс-рэлізе, прысвечаным гэтаму рашэнню, адзначаецца, што Беларусь застаецца аб’ектам “мэтанакіраваных эканамічных санкцый”, уключаючы абмежаванні ў фінансавым сектары, гандлі, таварах падвойнага прызначэння, тэхналогіях і тэлекамунікацыях, энергетыцы, транспарце і іншых.