Ціханоўская папрасіла мэра Сафіі — былога прадпрымальніка падтрымаць беларускі бізнэс за мяжой

5 сакавіка, Позірк. Далучыць прадстаўнікоў беларускага бізнесу за мяжой да праграм падтрымкі і “разнастайных інкубатараў” папрасіла Святлана Ціханоўская мэра Сафіі Васіла Тэрзіева.

Сустрэча адбылася 5 сакавіка падчас першага афіцыйнага візіту дэмакратычнага лідара ў Балгарыю, паведаміў “Позірку” яе галоўны дарадца Франак Вячорка.

Паводле яго слоў, Ціханоўская прапанавала суразмоўцу падтрымаць стажыроўкі для прадстаўнікоў “Кадравага рэзерву” пры Аб’яднаным пераходным кабінеце.

Ціханоўская папрасіла мэра падтрымліваць беларускую дыяспару ў Сафіі і распавяла аб праблемах, з якімі сутыкаюцца суайчыннікі ў вымушанай эміграцыі. “Акрамя таго, абмеркавалі супрацу ў сферы асветы і культуры”, — адзначыў Вячорка.

45-гадовы Тэрзіеў да абрання мэрам балгарскай сталіцы ў лістападзе 2023 года быў вядомым прадпрымальнікам, інвеставаў у тэхналагічныя кампаніі.

Вячорка таксама паведаміў, што на перамовах з намеснікам міністра юстыцыі Балгарыі Эмілам Дэчавым і былым прадстаўніком краіны ў ААН Стэфанам Тафравым абмеркаваны пытанні прыцягнення беларускага рэжыму да адказнасці праз Міжнародны крымінальны суд і Міжнародны суд ААН, пытанні легалізацыі беларусаў, апастыляў, прызнання пратэрмінаваных пашпартоў, сітуацыю з Інтэрпалам, “які рэжым спрабуе выкарстоўваць для выдачы палітычных апанентаў”; падтрымку дэмакратычных сіл Беларусі у структурах ААН.