МУС дадало ў “спіс экстрэмістаў” 18 чалавек

15 сакавіка, Позірк. Міністэрства ўнутраных спраў 15 сакавіка ўнесла ў спіс “асоб, якія маюць дачыненне да экстрэмісцкай дзейнасці”, яшчэ 18 чалавек, у тым ліку трох жанчын, — цяпер у ім 3.882 пазіцыі, сведчыць абноўлены дакумент на сайце ведамства.

Восем новых фігурантаў спісу знаходзяцца ў зняволенні:

Ветэран-“афганец” Уладзімір Лісіца — прыгавораны да 3 гадоў пазбаўлення волі паводле ч. 1 арт. 368 (абраза прэзідэнта) і арт. 369 (абраза прадстаўніка ўлады) Крымінальнага кодэкса;

Дыяна Стульба — асуджаная (прыгавор невядомы) паводле ч. 2 арт. 3612 КК (фінансаванне экстрэмісцкай дзейнасці);

удзельнік гомельскага аддзялення арганізацыі “Талака” Алег Кацапаў — прыгавораны паводле арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і арт. 368 КК;

Аляксандр Шкрадаў — прыгавораны паводле ч. 1 арт. 342 КК;

Арцём Коласаў — прыгавораны паводле ч. 1 арт. 368, арт. 369, ч. 2 арт. 367 (паклёп у дачыненні да прэзідэнта) КК;

Генадзь Жукель — прыгавораны да 1 года пазбаўлення волі паводле арт. 368 КК;

Віталь Лебедзеў — прыгавораны паводле ч. 1 арт. 3614 (садзейнічанне экстрэмісцкай дзейнасці), ч. 1 арт. 368 КК;

Павел Кунцэвіч — прыгавораны да 4 гадоў зняволення паводле ч. 3 арт. 361 КК (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь).

Лісіца, Стульба, Кацапаў, Жукель, Лебедзеў і Кунцэвіч прызнаныя палітвязнямі.

Праваабарончы цэнтр “Вясна” адзначае, што непагашаная судзімасць накладвае на чалавека шэраг абмежаванняў і паражае ў правах, у тым ліку ў праве на працу.

Фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.

На працягу пяці гадоў пасля выканання судовых рашэнняў людзі з гэтага пераліку не могуць займацца педагагічнай і выдавецкай дзейнасцю, быць на дзяржслужбе, карыстацца зброяй.