МУС дадало ў “спіс экстрэмістаў” яшчэ 32 чалавекі, у тым ліку 13 жанчын

22 сакавіка, Позірк. Міністэрства ўнутраных спраў 22 сакавіка ўнесла ў спіс “асоб, якія маюць дачыненне да экстрэмісцкай дзейнасці”, яшчэ 32 чалавекі, у тым ліку 13 жанчын, — цяпер у ім 3.914 пазіцый, сведчыць абноўлены дакумент на сайце ведамства.

13 новых фігурантаў спісу знаходзяцца ў зняволенні. У іх ліку палітвязні, асуджаныя на невядомы тэрмін пазбаўлення волі Віталь Красноў (паводле арт. 361² і арт. 361³ Крымінальнага кодэкса), грамадзянка Украіны Людміла Ганчарэнка (арт. 358¹), Сяргей Чурын (арт. 342), Уладзімір Фішман (арт. 361¹), Кацярына Мадзянкова (арт. 342), Сяргей Баншчык (арт. 342), Яўген Кіслоў (5 гадоў пазбаўлення волі паводле шасці артыкулаў КК, у тым ліку паводле арт. 293, арт. 361², арт. 361³), Сяргей Чыж (3 гады, арт. 367), Аляксандр Паліўка (7 гадоў, арт. 361, арт. 367, арт. 368, арт. 369, арт. 361¹).

Таксама спіс папоўнілі адбываючыя пакаранне Аляксандр Яцукевіч, Сяргей Якубёнак, Аляксандр Захарчык, Аляксандр Мішкавец.

Астатнія ўключаныя ў спіс знаходзяцца на волі з непагашанай судзімасцю.

Праваабарончы цэнтр “Вясна” адзначае, што непагашаная судзімасць накладвае на чалавека шэраг абмежаванняў і паражае ў правах, у тым ліку ў праве на працу.

Фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.

На працягу пяці гадоў пасля выканання судовых рашэнняў людзі з гэтага пераліку не могуць займацца педагагічнай і выдавецкай дзейнасцю, быць на дзяржслужбе, карыстацца зброяй.

Даведка “Позірка”:

арт. 293 Крымінальнага кодэкса — арганізацыя масавых беспарадкаў, якія суправаджаліся гвалтам над асобай, пагромамі, падпаламі, знішчэннем маёмасці або ўзброеным супрацівам прадстаўнікам улады;

арт. 342 — арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх;

арт. 358¹ — агентурная дзейнасць;

арт. 361¹ — стварэнне экстрэмісцкага фарміравання або ўдзел у ім;

арт. 361² — фінансаванне дзейнасці экстрэмісцкага фарміравання;

арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу;

арт. 367 — паклёп у дачыненні да прэзідэнта;

арт. 368 — абраза прэзідэнта;

арт. 369 — абраза прадстаўніка ўлады.