Канада ўвяла санкцыі супраць 21 грамадзяніна Беларусі, датычнага да рэпрэсій

15 красавіка, Позірк. Канада 12 красавіка ўвяла санкцыі супраць 21 грамадзяніна Беларусі, датычнага да рэпрэсій пасля прэзідэнцкіх выбараў у Беларусі 2020 года.

Як адзначаецца ў апублікаваным 15 красавіка рашэнні канадскага ўрада, санкцыі ўводзяцца супраць “беларускіх асоб, якія маюць дачыненне або саўдзельнічалі ў адвольных арыштах і затрыманнях, жорсткасці, запалохванні і празмерным ужыванні сілы ў дачыненні да беларусаў, якія пратэставалі супраць фальсіфікацыі выбараў, а таксама жорсткім абыходжанні з імі пасля таго, як яны былі асуджаныя па ілжывых абвінавачваннях і заключаны ў турму”.

У спіс уключаны:

1. Руслан Машадзіеў — начальнік папраўчай калоніі (ПК) № 1, Наваполацк, Віцебская вобласць;

2. Сяргей Карчэўскі — начальнік рэжымнай часткі ПК № 17, Шклоў, Магілёўская вобласць;

3. Святлана Бандарэнка — суддзя Вярхоўнага суда;

4. Раман Бізюк — старшы памочнік пракурора Маскоўскага раёна Мінска;

5. Андрэй Тарасевіч — суддзя суда Глыбоцкага раёна Віцебскай вобласці;

6. Ганна Асіпенка — суддзя суда Бабруйскага раёна і Бабруйска, Магілёўская вобласць;

7. Сяргей Маслюкоў — начальнік выхаваўчай калоніі, Бабруйск;

8. Яўген Бубіч — начальнік ПК № 2, Бабруйск;

9. Юрый Васілевіч — начальнік ПК № 14, Навасады, Барысаўскі раён, Мінская вобласць;

10. Аляксандр Карніенка — былы начальнік ПК № 17, Шклоў, Магілёўская вобласць;

11. Андрэй пальчык — былы начальнік ПК №1, Наваполацк;

12. Аляксандр Кароль — старшы пракурор аддзела Генеральнай пракуратуры;

13. Міхаіл Мурашкін — былы намеснік начальніка міліцыі — начальнік міліцыі грамадскай бяспекі Жодзінскага ГАУС Мінскага раёна;

14. Мікалай Максімовіч — намеснік начальніка міліцыі грамадскай бяспекі УУС Мінскага аблвыканкама;

15. Валянціна Зянькевіч — суддзя Мінскага гарадскога суда;

16. Зінаіда Балаболава — суддзя суда горада Наваполацка, Віцебская вобласць;

17. Галіна Кніжонак — суддзя суда Мазырскага раёна Гомельскай вобласці;

18. Ганна Леусік — суддзя суда Ленінскага раёна Гродна;

19. Генадзь Кудласевіч — суддзя суда Іванаўскага раёна Брэсцкай вобласці;

20. Іна Паўлоўская — суддзя суда Баранавіцкага раёна і Баранавічаў, Брэсцкая вобласць;

21. Дзмітрый Бубенчык — суддзя суда Гомельскага раёна.

Санкцыі накладаюць забарону на здзелкі з названымі асобамі (замарожваюць актывы ў краіне ў выпадку іх наяўнасці), забараняючы асобам у Канадзе і канадцам за межамі краіны займацца любой дзейнасцю, звязанай з маёмасцю пералічаных асоб, або прадастаўляць ім фінансавыя або звязаныя з імі паслугі. Пералічаным асобам таксама забараняецца ўезд у краіну.

Паводле інфармацыі на сайце канадскага ўрада, цяпер пад санкцыямі краіны знаходзіцца 211 фізічных і 71 юрыдычная асоба з Беларусі, датычныя да парушэння правоў чалавека ў краіне ці расійскай агрэсіі ва Украіне.

14 красавіка пачаўся візіт у Канаду беларускага дэмакратычнага лідара Святланы Ціханоўскай.