Прэм’ер Латвіі заявіла аб падрыхтоўцы новых санкцый ЕС супраць Беларусі
Эвіка Сіліня
18 красавіка, Позірк. Краіны — удзельніцы ЕС маюць намер падрыхтаваць новыя санкцыі супраць Беларусі ў сувязі з абыходам існых абмежаванняў “супраць расійскіх саюзнікаў Уладзіміра Пуціна і гандлем таварамі для ваеннай машыны Крамля”, паведаміла прэм’ер-міністр Латвіі Эвіка Сіліня 18 красавіка.
“Мы ўчора абмяркоўвалі, што выгады ад [расійскіх] замарожаных актываў павінны быць выкарыстаныя ў інтарэсах Украіны. Мы таксама гатовы да санкцый не толькі супраць Расіі, але і супраць Беларусі, таму што Беларусь выкарыстоўваецца Расіяй, каб не выконваць санкцыі”, — цытуе яе The Guardian.
Як паведамлялася, 18 красавіка карэспандэнт радыё RMF FM у Бруселі Катажына Шыманска-Баргінон напісала ў сацсетцы “Х”, што ў 14-ы пакет антырасійскіх санкцый Еўрасаюза будуць уключаны абмежаванні на імпарт сельскагаспадарчай прадукцыі з Беларусі і Расіі.
Паводле яе інфармацыі, палажэнне [аб увядзенні санкцый] ужо ёсць у праекце высноў саміту ЕС. “Створана кааліцыя з 12 краін (уключаючы Польшчу, краіны Балтыі, Францыю, Германію), якая патрабуе гэтага”, аднак “паўднёвыя краіны неахвотна ставяцца да прапановы з пункту гледжання харчовай бяспекі”, адзначыла журналістка.
“Будуць уведзены новыя забаронныя тарыфы на сельскагаспадарчую прадукцыю з Беларусі і РФ, ці дэ-факта санкцыі, — удакладніла Шыманска-Баргінон. — На наступным тыдні, 24–25 красавіка, Еўрапейская камісія пачне кансультацыі з краінамі ЕС па наступным, 14-м, пакеце санкцый супраць Расіі. Літва хоча, напрыклад, уключыць у яго звадкаваны прыродны газ, які па-ранейшаму імпартуецца многімі краінамі ЕС”.
Прэзідэнт Літвы Гітанас Наўседа 17 красавіка перад самітам ЕС у Бруселі заявіў, што заклікае Еўрасаюз увесці дадатковыя тарыфы на прадукты, якія імпартуюцца з Беларусі і РФ.
