Ціханоўская заклікала спікераў парламентаў краін ЕС “паказаць на практыцы”, што прызнаюць дэмакратычную Беларусь, а не рэжым

23 красавіка, Позірк. “Паказаць на практыцы” прызнанне дэмакратычнай Беларусі, а не “нелегітымнага рэжыму ў Мінску” заклікала Святлана Ціханоўская ўдзельнікаў саміту спікераў парламентаў краін Еўрасаюза ў Пальма-дэ-Маёрцы (Іспанія) 22 красавіка.

“Выступайце з заявамі, арганізуйце слуханні па Беларусі. Стварайце групы ў падтрымку дэмакратычнай Беларусі ў вашых парламентах і давайце ім афіцыйны статус”, — цытуе зварот Ціханоўскай яе прэс-служба.

“Парламенты могуць змяніць сітуацыю”, — лічыць дэмакратычны лідар Беларусі. “У адрозненне ад многіх, вы можаце называць рэчы сваімі імёнамі: Лукашэнка і Пуцін — злачынцы. А Беларусь — гэта Еўропа, а не Расія”, — заявіла яна.

Ціханоўская заклікала спікераў падтрымаць “еўрапейскія памкненні беларусаў”. “Трэба, каб, калі надыдзе час, дзверы ЕС былі адчыненыя для нас”, — падкрэсліла палітык.

Яна паведаміла, што “на наступным тыдні” (2 траўня на Мальце. — “Позірк”.) будзе падпісаны мемарандум аб супрацоўніцтве паміж дэмакратычнымі сіламі Беларусі з Еўрапейскім парламентам. “Так, раней так не рабілі. Але мы жывем у няпростыя часы, і ў такія часы простых рашэнняў недастаткова”, — сказала Ціханоўская.

Яна зноў заклікала дапамагчы Украіне “выйграць гэтую вайну”, “таму што гэта не “чыясці” вайна — гэта наша агульная вайна за свабоду”.

Дэмлідар падкрэсліла, што лёс Еўропы цяпер вырашаецца не толькі ва Украіне і Беларусі, але і ў Малдове, Грузіі і Арменіі.