Лукашэнка і Пуцін сінхронна ўхвалілі праект пагаднення аб адзінай сістэме мытнага транзіту ЕАЭС і трэціх бакоў

2 траўня, Позірк. Аляксандр Лукашэнка 2 траўня падпісаў указ, які ўхваляе праект “пагаднення аб адзінай сістэме мытнага транзіту Еўразійскага эканамічнага саюза і трэцяга боку (трэціх бакоў)”.

Правесці перамовы па праекту дакумента ўпаўнаважаны Дзяржаўны мытны камітэт.

Адметна, што ў гэты ж дзень аналагічнае ў сваёй сутнасці распараджэнне падпісаў прэзідэнт Расіі Уладзімір Пуцін.

Летась у лістападзе Еўразійская эканамічная камісія (ЕЭК) паведаміла, што ўхваленае Саветам ЕЭК пагадненне аб адзінай сістэме мытнага транзіту (АСМТ) спросціць і аптымізуе працэдуру перавозкі “як праз мінімізацыю дзеянняў кантралюючых службаў, так і шляхам скарачэння накладных выдаткаў бізнесу”.

Гэтага плануецца дасягнуць за кошт прымянення адзіных сродкаў і падыходаў — транзітнай дэкларацыі ў выглядзе электроннага дакумента, сістэмы выканання абавязку па выплаце мытных пошлін, падаткаў, адмысловых, антыдэмпінгавых, кампенсацыйных пошлін ды інш.