У чатырох раёнах уведзеная забарона на наведванне лясоў

5 траўня, Позірк. Забарона на наведванне лясоў уведзеная ў чатырох раёнах Брэсцкай вобласці — Брэсцкім, Кобрынскім, Жабінкаўскім і Маларыцкім, сведчаць актуальныя даныя інтэрактыўнай карты на сайце Міністэрства лясной гаспадаркі.

Лясы ў гэтых раёнах забаронена наведваць з 5 траўня, ім прысвоены 4-ы клас пажарнай небяспекі (“высокая пажарная небяспека”).

Усяго класаў небяспекі пяць, самы высокі 5-й сведчыць аб “надзвычайнай” пагрозе ўзгарання.

У 111 раёнах наведванне лясоў абмежавана.

Няма абмежаванняў на наведванне лясоў у Акцябрскім раёне Гомельскай вобласці, Бярэзінскім — Мінскай, Шклоўскім — Магілёўскай.

4 траўня Мінлясгас паведаміў аб ліквідацыі пяці ўзгаранняў у Магілёўскай і Гродзенскай абласцях на агульнай плошчы 1,5 га.

Увядзенне адпаведных абмежаванняў — адказнасць райвыканкамаў. У кожным раёне прымяняюцца свае меры абмежавальнага характару (час наведвання, уезд на транспарце, асобныя ўчасткі ляснога фонду).

Пры абмежаванні (жоўты ўзровень) дазваляецца наведванне лясоў, але не на аўтатранспарце і без запальвання вогнішчаў. Пры забароне (чырвоны ўзровень) лес наведваць нельга.