Наданнем кааліцыі “экстрэмісцкага” статусу рэжым Лукашэнкі прызнаў страх перад ёй, лічыць Латушка
8 траўня, Позірк. Хуткасць прызнання кааліцыі “Каманда Латушкі і Рух “За Свабоду” “экстрэмісцкім фарміраваннем” сведчыць пра тое, што рэжым Аляксандра Лукашэнкі адчувае ад яе пагрозу, такое меркаванне выказаў адзін з лідараў аб’яднання Павел Латушка.
“А гэта азначае тое, што мы робім усё правільна і з’яўляемся сапраўднай дэмакратычнай альтэрнатывай дыктатарскаму рэжыму”, — адзначыў палітык, які з’яўляецца таксама намеснікам кіраўніцы Аб’яднанага пераходнага кабінета і кіраўніком Народнага антыкрызіснага кіравання.
Паводле яго меркавання, для народа “вельмі важным з’яўляецца стварэнне альтэрнатыўных інстытутаў, якія будуць бараніць правы беларусаў, прадстаўляць Беларусь, <…> дабівацца змены сітуацыі ў нашай краіне, а ў будучыні — адказваць за транзіт улады”.
Латушка ад імя паплечнікаў заклікаў “усіх беларусаў усвядоміць важнасць гэтага моманту і ўзяць удзел 25–27 траўня ў выбарах у Каардынацыйную раду як у прадстаўнічы орган беларусаў”.
3 траўня КДБ прызнаў “экстрэмісцкім фарміраваннем” групу грамадзян “пад агульным кіраўніцтвам” Латушкі, а таксама “іншых асоб з ліку стваральнікаў, адміністратараў і іншых удзельнікаў інтэрнэт-рэсурсаў <…> “Каманда Латушкі і Рух “За Свабоду”. Адпаведныя звесткі ўнесеныя 8 траўня ў пералік на сайце Міністэрства ўнутраных спраў.
Згаданую назву носіць кааліцыя ў складзе 46 чалавек, якая балатуецца ў трэці склад Каардынацыйнай рады.
У структуру “фарміравання”, як сцвярджае спецслужба, уваходзяць сайт і тэлеграм-канал Народнага антыкрызіснага ўпраўлення; тэлеграм-каналы “Каманда Латушкі і Рух “За Свабоду”, “Рух “За Свабоду”, “Павел Латушка”; чаты “Павел Латушка — Чат”, “НАУ — chat”; ютуб-каналы “Павел Латушка”, Pawel Latuszka, “Народнае антыкрызіснае ўпраўленне”; старонкі Pavel Latushka ў “Інстаграме”, “Фэйсбуку” і Х, pavel_latushka ў “ЦікТоку”.
Удзельнікамі “фарміравання” КДБ назвала непасрэдна Латушку, лідара “Руху “За Свабоду” Юрася Губарэвіча, а таксама Уладзіміра Астапенку, Арцёма Брухана, Міхаіла Кірылюка, Наталлю Задэркоўскую, Яўгена Малашука, Юлію Камінскую, Ірыну Халопіцу, Аляксея Міхалевіча.